Lajme

Cilat janë arsyet e vizitës së senatorit amerikan, Jack Reed në Kosovë?

Autori: Gazeta inFokus 13:42 | 08 August 2023

Jack Reed, kryetari i Komitetit të Senatit për Shërbimet e Armatosura në Shtetet e Bashkuara të Amerikës do ta vizitojë Ballkanin Perëndimor këtë javë.

Reed do të vizitojë edhe Kosovën për të parë nga afër zhvillimet e sigurisë dhe politike në rajon dhe ndikimin e tyre në sigurinë kombëtare të Amerikës.

Senatori do të takohet me diplomatë dhe përfaqësues ushtarakë amerikanë, si dhe do të zhvillojë bisedime me liderë të huaj të rangut të lartë për të diskutuar marrëdhëniet SHBA-Kosovë, situatën e sigurisë dhe marrëdhëniet dypalëshe të Amerikës me partnerët e tjerë në rajon.

-Advertisement-

Reed planifikon të takohet me ushtarët e Rhode Island në terren për t’i falënderuar ata për shërbimin e tyre në mbështetje të misionit paqeruajtës ndërkombëtar të NATO-s, KFOR.

Forca paqeruajtëse e Kosovës (KFOR) e udhëhequr nga NATO, aktualisht përfshin anëtarë të Batalionit të Parë të Gardës Kombëtare të Rhode Island, Regjimentit të 126-të të Aviacionit, Batalionit 1, Regjimentit të 143-të të Këmbësorisë dhe Detashmentit të 110-të të Marrëdhënieve me Publikun. Ky do të jetë udhëtimi i tretë i senatorit Reed në Kosovë.

Pos Kosovës, Reed do të jetë edhe në vende të tjera të rajonit. Ai do të ndalojë gjithashtu në Komandën Evropiane të SHBA-së dhe në Komandën e Ushtrisë Amerikane për Evropë dhe Afrikë për t’u takuar me udhëheqësit ushtarakë dhe për të diskutuar luftën e Rusisë në Ukrainë dhe përpjekjet ndërkombëtare për të pajisur dhe trajnuar njësitë ushtarake të guximshme ukrainase ndërsa luftojnë për të mbrojtur sovranitetin e tyre.

Ai do të shqyrtojë gjithashtu programet e bashkëpunimit të sigurisë së SHBA-së me partnerët dhe aleatët në të gjithë Evropën dhe përpjekjet e vazhdueshme të NATO-s për t’iu përgjigjur ndryshimeve drastike në peizazhin e sigurisë evropiane.

Në çdo ndalesë të udhëtimit, senatori Reed planifikon të bëjë të qartë mbështetjen e Amerikës për demokracinë, diplomacinë, të drejtat e njeriut, sundimin e ligjit dhe përpjekjet kundër korrupsionit, shkruan Newport Buzz. Reed do të takohet edhe me presidenten Vjosa Osmani sot gjatë ditës.

Subscribe në YouTube: GAZETA INFOKUSI