Procesi i verifikimit të listave të kandidatëve për deputetë nga partitë politike për zgjedhjet e 14 shkurtit do të përfundojë me datën 30 janar.

Kështu ka bërë të ditur në një intervistë për Gazetën inFokus, zëdhënësi i KQZ-së, Valmir Elezi, i cili ka thënë se listat të cilat subjektet politike i dërgojnë në KQZ, ky institucion do ti dërgojë listat në gjashtë institucione të tjera të vendit.

“Sa i përket çështjes së verifikimit ne do ti dërgojmë listat në 6 institucione të Kosovës dhe presim që të na përgjigjen deri me datë 20 janar për këto lista, të cilat ne i dërgojmë atje. Menjëherë pas përgjigjes në KQZ do të paraqiten rekomandimet për verifikimin ose jo të ndonjë kandidati politik, varësisht nëse i ka përmbushur kriteret ligjore dhe pastaj pas vendimmarrjes së KQZ-së nëse ndonjëri nga kandidatet është i pakënaqur sigurisht që mund të dorëzojë në Panelin Zgjedhor për Ankesa dhe Parashtresa ankesën e tij dhe në rast se nuk pajtohet as me vendimin e këtij institucioni çështja mund të shkojë deri në Gjykatë Supreme. I gjithë procesi i ankesave dhe vendosjes për to pritet të përfundojë në bazë të planit operacional me 30 janar, në mënyrë që pastaj me datën 3 shkurt të mundemi që të organizojmë tërheqjen e shortit për renditjen e subjekteve politike”, ka thënë Elezi.

Ai po ashtu ka deklaruar se verifikimi i listave për persona që janë të dënuar me vendim të prerë në tre vitet e fundit do të bëhet nga Këshilli Gjyqësor i Kosovës.

“Pikërisht për të qartësuar të gjitha çështjet nëse subjektet politike kandidatët e tyre janë në përputhje me ligjin për zgjedhjet e përgjithshme, KQZ-ja do ti drejtojë shkresat e tyre në 6 institucione. Sa i përket çështjes së personave të dënuar me dënimin e formës së prerë, KQZ-ja do të bashkëpunojë me Këshillin Gjyqësor të Kosovës, nga ku do të kërkojë verifikim nëse ndonjëri nga kandidatët është i dënuar me vendim të formës së prerë në tre vitet e fundit dhe të gjitha këto do të futen në mbledhjen e Komisionit Qendror Zgjedhor”, ka deklaruar Elezi.

Për detaje të tjera mund të ndiqni në vazhdim intervistën e plotë me Valmir Elezin./Gazeta inFokus/