Lajme

Çavasoglu në takim me Kurtin: Turqia nuk do lejojë që Ballkani të kthehet në vitet ’90-ta

Autori: Gazeta inFokus 16:38 | 19 June 2022

Kryeministri Albin Kurti ka pritur sot në takim Ministrin e Punëve të Jashtme të Turqisë, Mevlut Çavusoglu.

“Republika e Turqisë është partner, mik dhe aleat i madh i Republikës së Kosovës”, tha Kurti, teksa shprehu mirënjohjen për mbështetjen e vazhdueshme të Turqisë.

Kryediplomati turk theksoi mbështetjen e Turqisë për pavarësinë, sovranitetin dhe integritetin territorial të Kosovës, sikurse edhe për anëtarësimin në organizata ndërkombëtare. Ai tha se Turqia e mbështet anëtarësimin e vendit tonë në Këshillin e Evropës dhe se Kosova është vend partner i NATO-s. Po ashtu, Çacasoglu theksoi se Turqia e ka shumë të rëndësishme paqen dhe stabilitetin, dhe se nuk do të lejojë që rajoni i Ballkanit të kthehet në vitet e errëta të viteve 90.

-Advertisement-

Tutje ministri vlerësoi marrëdhëniet e shkëlqyera bilaterale, rritjen e bashkëpunimit ekonomik dhe të investimeve.

Duke potencuar stabilitetin institucional dhe indikatorët pozitiv ekonomik, kryeministri Kurti ritheksoi përkushtimin e Qeverisë për nxitjen e investimeve nëpërmjet zhvillimit të qëndrueshëm ekonomik e social, dhe luftimit të krimit dhe korrupsionit. Kurti veçoi synimin e Kosovës për anëtarësim në Partneritetin për Paqe të NATO-s ndërsa theksoi mundësitë për rritje të bashkëpunimit në mbrojtje dhe siguri.

“U diskutua për shumë fusha të bashkëpunimit në ekonomi, energji, siguri dhe mbrojtje. U vlerësuan lidhjet e shumta mes dy vendeve, duke veçuar ato mes qytetarëve, që janë një urë për marrëdhëniet e forta dypalëshe”, thuhet në komunikatën e Qeverisë, transmeton Klankosova.tv.

Subscribe në YouTube: GAZETA INFOKUSI