Lajme

Canolli: Përmasat e ekstremizmit paraqesin kërcënim për sigurinë e vendit

Autori: Gazeta inFokus 11:28 | 13 July 2017

Reagimi i institucioneve të Kosovës ka sjellë rezultate shumë të mira në parandalimin e ekstremizmit.

Kështu u tha sot në tryezën e rrumbullakët mbi implementimin e Strategjisë Nacionale dhe planit të veprimit në parandalimin e ekstremizmit të dhunshëm dhe radikalizmit që shpie në terrorizëm 2015 – 2020, të titulluar “Fuqizimi i rolit të gruas në parandalim të ekstremizmit të dhunshëm; të arriturat dhe sfidat në Komunën e Prishtinës”, organizuar nga Qendra Kosovare për Studime të Sigurisë.

Fitore Pacolli, shefe e kabinetit të kryetarit të Prishtinës, tha se tema e ekstremizmit është e re edhe për shtetet tjera.

-Advertisement-

“Komuna e Prishtinës është pjesë e rrjetit të qyteteve të forta dhe unë jam caktuar si koordinatore dhe kësisoj kemi marrë pjesë në shumë takime. Në këtë mënyrë kemi pasur mundësinë të shohim se çfarë kanë bërë qytetet tjera dhe të bëjmë edhe ne”, ka thënë Pacolli.

Ajo tha se Komuna e Prishtinës është fokusuar në politikat sociale dhe gjendjen e gruas, si dhe problemet e shumta që kanë pasur gratë, siç ka qenë mungesa e sigurisë së një page.

Taibe Canolli, nga Policia e Kosovës, tha se Shoqata e grave të Policisë së Kosovës është e vetmja organizatë që merr pjesë në luftimin e radikalizmit dhe të ekstremizmit.

Ajo tha se përmasat e ekstremizmit paraqesin kërcënim për sigurinë e vendit.

Për më tepër Canolli tha se reagimi i institucioneve të Kosovës ka sjellë rezultate shumë të mira në parandalimin e ekstremizmit.

Ndryshe, qëllimi i këtij aktiviteti është të diskutohet mbi angazhimin e tanishëm të grave në parandalim të ekstremizmit të dhunshëm në Komunën e Prishtinës.

Subscribe në YouTube: GAZETA INFOKUSI