Lajme

Burim Ramadani: Kolapsi Energjetik të trajtohet si Sabotim ndaj shtetit

Autori: Gazeta inFokus 19:27 | 21 June 2025

Eksperti i çështjeve të sigurisë, Burim Ramadani, ka reaguar ashpër pas kolapsit energjetik në vend, duke e cilësuar këtë situatë si rezultat i një sabotimi të mundshëm që, sipas tij, ka dëmtuar sigurinë kombëtare dhe rendin kushtetues të Republikës së Kosovës.

Në një reagim publik, Ramadani ka ngritur dyshime serioze për veprime apo mosveprime të qëllimshme nga ana e Qeverisë dhe menaxhmentit të Korporatës Energjetike të Kosovës (KEK). Ai ka theksuar se për katër vjet me radhë nuk janë ndërruar tubat e kazanave (ekonomizerët), ndonëse autoritetet kanë qenë të vetëdijshme për pasojat e mosmirëmbajtjes së tyre.

“Ka elemente të dukshme, në bindjen time, për t’i trajtuar përgjegjësit në Qeveri dhe në KEK përmes dyshimit të veprës penale të Sabotimit. Pse nuk janë ndërruar tubat e kazanave kur është dashur, duke qenë saktësisht të vetëdijshëm për dëmin që e shkakton mosndërrimi i tyre?”, ka shkruar Ramadani.

-Advertisement-

Ai ka kërkuar reagim të menjëhershëm nga institucionet e drejtësisë, duke theksuar se shteti ligjor duhet të veprojë dhe të hetojë përgjegjësit për këtë kolaps që, sipas tij, ka dëmtuar interesin publik dhe sigurinë kombëtare.

“Ka dyshime për Sabotim, gjë që është e sanksionuar me Kodin Penal të Republikës së Kosovës,” ka shtuar më tej ai.

Kolapsi i fundit energjetik ka shkaktuar reagime të shumta në publik dhe politikë, ndërsa institucionet përgjegjëse nuk kanë dhënë ende një përgjigje të plotë për shkaqet teknike dhe menaxheriale të situatës.

Subscribe në YouTube: GAZETA INFOKUSI
Edhe dy medalje të arta – Viva Fresh, lider në cilësi, produkte dhe shërbime në Kosovë
-Advertisement-

Të tjera

Fokusi

lajme