Lajme

Brukseli i përgjigjet Presidentes Osmani që tha s’ka takime me Vuçiqin pa u aprovuar sanksionet ndaj Serbisë

Autori: Gazeta inFokus 15:11 | 10 October 2023

Zëdhënësi i BE-së, Peter Stano, tha se Kosova dhe Serbia duhet t’i kthehen dialogut të lehtësuar nga Unioni dhe se është ende në pritje të një hetimi të plotë e përfundimtar për sulmin terrorist në Banjskë.

“Nuk ka rrugë tjetër, duhet t’i kthehemi dialogu. BE-ja është lehtësues i dialogut, BE-ja është ndërmjetës i ndershëm, që ndihmon palët për të gjetur konsensusin”.

Ai tha se do të përsërisë që rruga e vetme e Kosovës dhe Serbisë kapërcen nëpër dialog dhe se këtu s’ka asgjë për të re për të shtuar dhe se s’ka rrugë anësore për këtë.

-Advertisement-

“Të dyja palët duhet ta kuptojë këtë që dialogu duhet të vazhdojë dhe se ata duhet të angazhohen në një mënyrë kuptimplote duke provuar që të arrijnë kompromiset e nevojshme për të normalizuar raportet. Sa i takon 24 shtatorit, presim rezultatet e plota të një hetimi të kompletuar për të pasë një pasqyrë të qartë se çka ndodhi dhe kush ishte prapa”.

I pyetur nëse BE ka përgatitur një pako masash kundër Serbisë, Stano tha se procedurat janë konfidenciale.

Stano tregoi edhe pritshmëritë aktuale të BE-së për të dyja palët, derisa përmendi që masat Kosovës i hiqen kur të ketë deeskalim.

“Në këtë fazë ne vërtet duhet të shohim, së pari hapa drejt një deeskalimi kuptimplotë; rikthimi në dialog; dhe sa i përket ngjarjeve të 24 shtatorit një hetim të plotë dhe përfundimtar”.

Deklaratat e presidentes Vjosa Osmani se nuk takohen me presidentin e Serbisë derisa vendi i tij nuk sanksionohet për aktin agresor ndaj Kosovës, Stano iu referua si “të ashtuquajtura kushte”.

“Dhe kur bëhet fjalë për këto të ashtuquajtura kushte për t’u kthyer në dialog, BE-ja dhe partnerët ndërkombëtarë ishin shumë të qartë: dialogu duhet të vazhdojë, të dyja palët duhet të kthehen në dialog. Pikë”.

Po ashtu, Stano u pyet nga një gazetar i Serbisë se me kë duhet të bashkëpunojë Serbia për hetimin e sulmit të Banjskës, duke aluduar në atë që Serbia s’i njeh institucionet e Kosovës.

“Ne presim bashkëpunim të plotë dhe të pakushtëzuar nga Serbia. Si e bën, varet nga Serbia. Ka mënyra nëse ka vullnet, ka shumë mënyra. Nuk na takon të dërgojmë mesazhe përmes domenit publik. Partnerët tonë në Serbi e dinë mirë se çka duhet të bëjnë dhe se çka pritet të bëjnë”.

Subscribe në YouTube: GAZETA INFOKUSI