Shefi i Misionit të OSBE-së, Ambasadori Jan Braathu ka thënë se situata në mes partive serbe në veri të Kosovës është mjaft e brishtë, të cilat janë shoqëruar me disa incidente në Leposaviq.

Braathu u ka bërë thirrje të gjitha subjekteve politike në vend që të respektojnë të drejtën e votës për secilin person.

Ai këto komente i bëri në vizitën që sot pati në Panelin Zgjedhor për Ankesa dhe Parashtresa ku ua dorëzoi formularin e ankesave të alfabetit Brail për personat e verbër.

“Situata është mjaft e brishtë, fatkeqësisht kanë ndodhur disa incidente sidomos në Leposaviq, ju kujtohet që OSBE së bashku me ambasadën amerikane ka lëshuar një deklaratë të përbashkët përmes së cilës iu bëjmë thirrje që të sigurohet një proces fer dhe i drejtë dhe me atë rast kemi dënuar çdo rast të kërcënimit. Fatkeqësisht po shohim shenja që këto kërcënime po vazhdojnë në disa lokalitete. Kërcënimet dhe dhuna nuk kanë fare vend më vendet dhe proceset demokratike. Ne iu bëjmë thirrje të gjitha subjekteve politike që të respektojnë të drejtën e secilit person , të votojnë lirshëm secili person ashtu siç ia merr mendja në mënyrë që të sigurohet vërtet një proces i lirë, i drejtë dhe paqësor zgjedhor. Do të ishte tragjike sikur të cenohej jeta e njeriut në një proces zgjedhor si pasojë e ngritjes së tensioneve”, tha Brathu.

Shefi i OSBE-së tha se më anë të formularëve për alfabetin e Braillit personat e verbër do të kenë mundësi të kenë qasje të plotë në këtë proces zgjedhor.

“Kemi arritur t’iu ndihmojmë në prodhimin e këtyre formularëve, të cilët do të ndihmojnë të gjithë personave të verbër që të kenë qasje të plotë në procesin zgjedhor, përfshirë edhe në dorëzimin e ankesave. Kjo është për respektimin e të drejtave të njeriut dhe për tu mundësuar qasje të gjithë personave që të kenë qasje të plotë në proceset zgjedhore dhe qasje në jetën publike”, tha ai.

Ndërkaq, kryetarja e PZAP, Gyltene Sylejmani tha se janë përgatitur gjithsej 500 formularë për ankesa në alfabetin Brail dhe këta formularë do të iu japin mundësi personave të verbër të raportojnë për çdo shkelje që do të mund të iu bëhet atyre.

“Personat me aftësi të kufizuara do të kenë qasje në informacione lidhur me paraqitjen e ankesave për shkeljen eventuale gjatë zgjedhjeve…..Të shfrytëzojnë këtë mundësi, të marrin pjesë në mënyrë të barabartë me të gjithë kandidatët tjerë dhe të shprehin pa kënaqësitë e tyre nëpërmjet procedurave të ankimimit”, tha ajo.

Ndërkaq përfaqësuesi nga shoqata e të verbërve, Bekim Krasniqi ka falënderuar PZAP që kanë marr parasysh kërkesën e tyre dhe këtyre personave iu kanë dhënë mundësi të jenë të barabartë me personat tjerë.

“Ne do t’iu bëjmë thirrje të gjithë personave të verbër që të jenë pjesë e procesit zgjedhor të votimit dhe pastaj të në rast se vërejnë ndonjë shkelje apo pakënaqësi të tyre ta shprehin duke e shfrytëzuar këtë formular që është risi në vendin tonë”, tha Krasniqi.

Formularët për ankesa në alfabetin Brail për personat e verbër është i shkruar në gjuhën shqipe, serbe dhe turke.

Comodita në Gjermani shpalos koleksionin e produkteve të reja në panairin Heimtextil në Frankfurt

Sponsoruar