Ekonomi

BQK: Ekonomia e Kosovës do të rritet në 4.4 %

Autori: Gazeta inFokus 11:49 | 13 May 2018

Banka Qendrore e Republikës së Kosovë (BQK), ka njoftuar se Kosova edhe këtë vit do të ketë bilanc të mirë sa i përket aktiviteteve ekonomike.

Sipas projeksioneve të BQK-së, aktiviteti ekonomik gjatë vitit 2018 do të shënojë një përmirësim të lehtë krahasuar me të dhënat aktuale të vitit 2017, duke u luhatur në një interval prej 4.2 për qind në 4.4 për qind.

“Ky përmirësim i lehtë i atribuohet stimulit të përforcuar fiskal gjatë vitit 2018, veçanërisht ai i gjeneruar nga shpenzimet kapitale të qeverisë”, thuhet në raportin e BQK-së për vlerësimin tremujor të Ekonomisë.

-Advertisement-

Sipas BQK-së edhe remitancat dhe aktiviteti kredidhënës, edhe gjatë vitit 2018, do të vazhdojnë të jenë burime të qëndrueshme për financimin e aktivitetit ekonomik.

“Ambienti i jashtëm do të jetë favorizues për bilancin tregtar, si rezultat i rritjes më të ngadaltë të çmimeve të mallrave bazë në tregjet ndërkombëtare dhe një rishikim për lartë të aktivitetit ekonomik në vendet partnere tregtare të Kosovës”, thuhet në raportin e BQK-së për vlerësimin tremujor të Ekonomisë, raporton televizioni publik.

Në linjë me zhvillimet në aktivitetin ekonomik, në tremujorin e katërt të vitit 2017, shkalla e punësimit u rrit lehtësisht në 29.8 për qind krahasuar me vlerën 29.5 për qind në periudhën e njëjtë të vitit të kaluar.

“Pavarësisht kësaj, norma e papunësisë u luhat rreth vlerës 30.6 për qind në tremujorin e katërt të vitit 2017 ndërkohë që në tremujorin e fundit të vitit 2016 kjo normë regjistroi një vlerë më të ulët, rreth 28.7 për qind. Arsyeja pse rritja e shkallës së punësimit nuk është reflektuar në reduktimin e normës së papunësisë qëndron në rritjen e shkallës së pjesëmarrjes në fuqinë punëtore në vlerën 42.9 për qind në fund të vitit 2017 krahasuar më shkallën prej 41.3 për qind në fund të vitit 2016. Tendencat e treguesve kryesorë të punës të shënuar gjatë tremujorit të katërt janë të njëjta me zhvillimet e regjistruara gjatë gjithë vitit 2017”, thuhet në raportin e BQK-së për vlerësimin tremujor të Ekonomisë.

Subscribe në YouTube: GAZETA INFOKUSI
Etiketa:
Ku mos mu HUTU me BLACK FRIDAY Artmotion
-Advertisement-

Të tjera

Fokusi

ekonomi