Lajme

Blerta Deliu reagon pas shkarkimit të Bordit të RTK-së: Kurti e Osmani po duan ta mbyllin gojën e çdo gazetari

Autori: Gazeta inFokus 13:50 | 08 July 2021

Deputetja e PDK-së, Blerta Deliu-Korda ka reaguar pas shkarkimit të Bordit të RTK-së.

Ajo përmes një postimi në Facebook ka deklaruar se vendimi i sotëm i Kuvendit do të mbetet njollë e pashlyeshme në historinë e një republike parlamentare.

Deliu-Kodra pohon se Albin Kurti dhe Vjosa Osmani me partitë e tyre po sillen si të ishin në një shtet diktatorial dhe po duan ta mbyllin gojën e çdo gazetari, shkruan Reporteri.net.

Sot është një ditë e rëndë për demokracinë dhe lirinë e shprehjes në Republikën e Kosovës. Sot, partia e Albin Kurtit, që e ka shumicën në Kuvend dhe me miratimin e heshtur të Vjosa Osmanit, mori vendim për shkarkimin e Bordit të Televizionit Publik në Kosovë.

Postimi i saj:

Partia e Albin Kurtit, Vetëvendosja, luftën që e ka nisur prej vitesh kundër RTK-së, po e vazhdon duke shkarkuar një bord. Nuk po shkarkohet një bord i një ndërmarrje publike, por bordi i një mediumi.

Këtë shembull nuk do ta gjeni në asnjë shtet demokratik. Ky është një lajm i rëndë për një shtet që synon anëtarësimin në Bashkimin Evropian.

Ky vendim i Kuvendit do të mbetet njollë e pashlyeshme në historinë e një republike parlamentare.

Ajo çfarë po ndodh në Kuvendin e Kosovës mund të duket si në Bjellorusinë e diktatorit Aleksandër Lukashenko. Para dy muajsh, shteti i Lukashenkos, e ka devijuar rrugën e një aeroplani, me qëllimin e vetëm që ta rrëmbejë një gazetar. Ia ka arritur.

Sot, Albin Kurti dhe Vjosa Osmani me partitë e tyre po sillen si të ishin në një shtet diktatorial. Po duan ta mbyllin gojën e çdo gazetari.

Dje kur e morën qeverinë e dërguan policinë në zyret e një mediumi vetëm për shkak të një artikulli të vërtetë se Ministri i Shëndetësisë nuk kishte nënshkruar kontratën për sigurimin e vaksinave anti-COVID-19, sot e shkarkuan bordin e një mediumi, e nesër kushedi se çka janë në gjendje të bëjnë.

Të tjera