Lajme

Bjellorusia dyfishon trupat në kufi me Ukrainën

Autori: Gazeta inFokus 08:45 | 02 March 2022

Bjellorusia do të dyfishojë numrin e trupave të saj në kufirin jugor me Ukrainën, tha udhëheqësi i këtij vendi, Alexander Lukashenko.

Grupet e batalioneve taktike në kufi do të rriten nga pesë në dhjetë gjatë dy ditëve të ardhshme, tha ai.

Sipas tij, këto janë grupe mobile, të trajnuara mirë dhe të gatshme “për të ndaluar çdo provokim dhe çdo veprim ushtarak kundër Bjellorusisë”.

-Advertisement-

Duke folur para Këshillit të tij të Sigurisë, Lukashenko e cilësoi mobilizimin si “veprim parandalues”.

Vendet perëndimore kanë vendosur sanksione ndaj Bjellorusisë, për shkak të mbështetjes së Rusisë në pushtimin e Ukrainës.

Bjellorusia thuhet se i ka mbështetur trupat ruse me forcat e veta.

Rusia ka nisur pushtimin e paprovokuar të Ukrainës më 24 shkurt, pasi nuk ka marrë garanci se NATO-ja nuk do të zgjerojë aleancën e saj ushtarake drejt lindjes.

Perëndimi e ka dënuar ashpër veprimin, duke e cilësuar si shkelje të sovranitetit dhe integritetit territorial të Ukrainës, dhe ka ndërmarrë një varg sanksionesh kundër subjekteve dhe individëve rusë.

Presidenti rus, Vladimir Putin, ka thënë se ka autorizuar “një operacion të posaçëm ushtarak” në Ukrainë, për të eliminuar, sipas tij, kërcënimin serioz nga ky vend.

Subscribe në YouTube: GAZETA INFOKUSI