Lajme

Bislimi: Pritet që në janar të nënshkruhet tema e të zhdukurve

Autori: Gazeta inFokus 14:21 | 06 December 2022

Zëvendëskryeministri, Besnik Bislimi, ka raportuar lidhur me dialogun dhe planin franko-gjerman në Komisionin për Punë të Jashtme dhe Diasporë, ku tha se në takimet e fundit në Bruksel është folur për dy tema kryesore, ajo për targat dhe marrëveshja për energjinë elektrike për komunat veriore të Kosovës dhe se ka kërkuar që edhe tema e të pagjeturve të jetë pjese e marrëveshjes së fundit.

“Pritjet janë që në janar të nënshkruhet mes palëve tema e të zhdukurve, sigurisht nëse ne do të jemi dakord me ato çka do të jenë në dokument. Rreth kësaj teme është diskutuar në vazhdimësi”, deklaroi Bislimi.

Ndërkaq sa i përket propozimit franko-gjerman, ai tha se është kërkuar nga negociuesit e BE-së që të mos jepen detaje për këtë marrëveshje.

-Advertisement-

“Kemi arritur dakordim me BE-në që të kemi marrëveshje gjithëpërfshirëse. Temat që janë diskutuar janë tema e lëvizjes së lirë dhe e dyta me energjinë, tema e tretë ka qenë tema e të pa gjeturve dhe kam kërkuar që kjo të mos lihet jashtë marrëveshjes”.

“Në të dyja temat kemi arritur marrëveshje të mira. Propozimi në planin franko-gjerman ka qenë që marrëveshja të përfundojë në fundin e marsit 2023. Për propozimin ka një dakordim në mes propozuesve që përmbajtja e këtij plani të mbahet larg nga publiku dhe nuk mund të nxjerrim detaje për këtë propozim”, tha ai.

Subscribe në YouTube: GAZETA INFOKUSI