Zëvendëskryeministri i parë për Integrim Evropian, Zhvillim dhe Dialog Besnik Bislimi po raporton sot në Komisionin për Integrim Evropian.

Nga deputetët e opozitës Bislimi është kritikuar rreth mbrojtjes së pushteti po i bën të dyshuarit për përfshirje në një skandal financiar, Martin Berishajt, ambasador i Kosovës në Kroaci, shkruan Gazeta Online Reporteri.net.

“Një ambasador me një megaskandal po ta përfaqëson Kosovën në Kroaci, ka thënë kryesuesja e komisionit, deputetja  e LDK-së, Rrezarta Krasniqi. E Bislimi është përgjigjur se emri i Berishajt nga ana e opozitës po përdoret për poena politikë.

“Ju e dini shumë mirë që rasti i Martin Berishajt është konstrukt artificial i ndërtuar nga subjektet politike në Kosovë. Nuk ka asnjë proces gjyqësor ndaj tij, është e turpshme se si zvarritet emri i një intelektuali të shquar si Martin Berishaj për ndonjë poen politik. Sikur Martin Berishaj të kishte prapa vetes ndonjë dënim mund të flisnim por të gjitha këto janë spekulime dhe është dokumentuar qartë se nuk ka asnjë të vërtetë në të”, ka thënë ai.

Gjatë ditës së djeshme, në mbrojtje Bislimit i ka dalë edhe Ministrja e Punëve të Jashtme, Donika Gërvalla.

Pasi u pyet në konferencë për media – ku përkrah kishte homologun e saj nga Kroacia, Gordan Grlic-Radman – Gërvalla argumentoi se ambasadori në fjalë i ka thënë ato që ka pasur për t’i thënë në seancën me komisionin parlamentar, dhe se ajo nuk po arrin ta kuptojë se si personat që i kanë miratuar përgjigjet e tij me tundje koke, tash dalin kundër.

“Në marrëveshje edhe me ministrinë e Punëve të Jashtme, ambasadori Berishaj i ka dhënë përgjigjet e tij në komisionin parlamentar ku është dashur të japë deklaratën e tij, e kam ndjekur me shumë vëmendje atë seancë të komisionit parlamentar, e kam parë që asnjë pyetje nuk ka mbetur pa përgjigje në atë seancë të komisionit parlamentar, edhe e kam parë miratimin e anëtarëve të komisionit të deklaratave të ambasadorit Berishaj gjatë asaj seance dhe prandaj më habit shumë fakti që pa pritur e pa kujtuar muaj më vonë, të njëjtit persona që kanë qenë të pranishëm në atë seancë dhe që kanë pohuar dhe tundur kokën për secilën prej deklaratave të ambasadorit Berishaj më pas dalin dhe deklarojnë diçka krejt tjetër për një seancë të cilën e kemi parë të gjithë publikisht”, ka thënë Gërvalla në konferencë për media.

“Unë nuk besoj që ambasadori Berishaj e ka problem t’u japë përgjigje mediave tona me siguri në një moment kur do të ketë më pak angazhime bilaterale, do t’ju thërrasim një ditë dhe do t’ju qëndrojmë të dy, pyetje-përgjigje pa asnjë lloj problemi, pa asnjë lloj refuzimi”.

Ajo shtoi se ata të cilët po vazhdojnë me akuza ndaj Berishajt, është koha të vijnë me fakte, dhe jo vetëm të flasin bazuar mbi supozime.

“Por mendoj që ka ardhur një moment kur të gjithë ata që e vazhdojnë fushatën do të duhej ta pyesnin veten, a thua a vazhdohet fushata vetëm në bazë të supozimeve apo ka kaluar aq kohë sa në ndërkohë do të duhen faktet në tavolinë para se të vazhdojmë me fushata, me kampanja politike ndaj personave të caktuar?” ka përfunduar Gërvalla.

Prince Caffe zgjeron shtrirjen në rajon, arrin marrëveshje bashkëpunimi me zinxhirin kroat Plodine

Sponsoruar