Lajme

Bisedimet me Serbinë, KDI e kritikon Qeverinë për mostransparencë

Autori: Gazeta inFokus 16:47 | 27 January 2023

Instituti Demokratik i Kosovës i ka kërkuar Qeverisë të japë qartësi për qytetarët mbi dialogun Kosovë-Serbi.

Përmes një komunikate, KDI-ja ka thënë se vizitat e shpeshta të emisarëve special nga Shtetet e Bashkuara dhe Bashkimi Evropian po dëshmojnë për një dinamikë të shtuar në dialogun mes Kosovës dhe Serbisë, ndërsa qytetarët janë të painformuar mbi përmbajtjen e takimeve të ndërlidhura me dialogun dhe dakordimet eventuale lidhur me këtë proces.

E njëjta paqartësi, sipas KDI-së po bëhet edhe me propozimin evropian dhe Asociacionin. Mostransparenca e Qeverisë po krijon hapësirë për dezinformim, ka thënë KDI.

-Advertisement-

“Diskutimet mbi përmbajtjen e propozimit Franko-Gjerman/Evropian dhe zbatimin e Marrëveshjes së Dialogut mbi Asociacionin janë temat kryesore në debatet mediale, ndërkohë që po mungon një debat i strukturuar politik e shoqëror dhe një mostransparencë e theksuar e Qeverisë mbi qëndrimet e saj në raport me këto propozime. Duke qenë i mbyllur dhe i reduktuar, ky proces çdo ditë e më tepër po krijon hapësirë për dezinformim, pasiguri dhe ulje të besimit të publikut”.

KDI-ja thotë se për shkak të shmangies së Qeverisë, informacionet selektive dhe deklaratat e kufizuara të emisarëve ndërkombëtarë mbeten burimet e vetme të informacioneve.

“Prandaj Qeveria si mandatare për të udhëhequr dialogun me Serbinë duhet të jetë e hapur dhe t’a informojë publikun lidhur me qëndrimet e saj dhe të priturat nga ky proces. Kjo duhet të përfshijë edhe raportimet me vetiniciativë të Kryeministrit në Kuvendin e Kosovës, si institucioni më i lartë përfaqësues”.

KDI-ja tutje thotë se partitë opozitare do të duhej ta ftonin kryeministrin Albin Kurti për raportim në Kuvend.

“Në këtë drejtim, opozita përmes praktikave dhe instrumenteve kushtetuese parlamentare, do të duhej të ftonte Kryeministrin në raportim në një seancë të jashtëzakonshme të Kuvendit, në lidhje me zhvillimet në procesin e dialogut”.

Subscribe në YouTube: GAZETA INFOKUSI
BKT Kosova Nënshkruan Parimet për Fuqizim të Grave (WEPs)
-Advertisement-

Të tjera

Fokusi

lajme