Lajme

Biden: SHBA-ja do të vazhdojë të qëndrojë krah Shqipërisë

Autori: Gazeta inFokus 14:59 | 28 Korrik 2022

Presidenti amerikan, Joe Biden, ka thënë se Shtetet e Bashkuara të Amerikës do t’i qëndrojnë përkrah Shqipërisë përgjatë punës së saj në forcimin e institucioneve demokratike dhe luftimin e korrupsionit, si dhe rrugëtimin e vendit për t’u bërë anëtar i Bashkimit Evropian.

Përmes një video-mesazhi drejtuar qytetarëve të Shqipërisë me rastin e shënimit të 100-vjetorit të vendosjes së marrëdhënieve diplomatike me SHBA-në, presidenti Biden tha se çmon miqësinë mes dy popujve.

“SHBA-ja do të vazhdojë të qëndrojë krah Shqipërisë teksa vazhdoni punën për të forcuar institucionet demokratike, të luftoni korrupsionin, të forconi sundimin e ligjit dhe vijoni udhëtimin tuaj për t’u anëtarësuar në Bashkimin Evropian”.

-Advertisement-

“Uroj që dy kombet tona të vazhdojnë të ndërtojnë gjithçka kemi arritur bashkë dhe t’u japim fëmijëve tanë një të ardhme më të ndritur e më shpresëdhënëse”, tha ai.

Presidenti amerikan falënderoi Shqipërinë për strehimin e mijëra afganëve që ikën nga regjimi taleban në Afganistan. Shqipëria ka qenë ndër vendet e para që ka strehuar 2.400 afganë.

Biden thha gjithashtu tha se Shqipëria “ka dhënë një kontribut vendimtar për mbështetjen e popullit ukrainas, teksa mbron vendin e vet nga lufta brutale e Rusisë”.

“Kur Shtetet e Bashkuara mbrojtën pavarësinë e Shqipërisë pas Luftës së Parë Botërore, u krijua një miqësi e përhershme midis popujve tanë, një dashuri e përhershme për lirinë dhe vlerat e demokracisë, të cilat nuk u thyen kurrë as kur populli i Shqipërisë ishte nën diktaturë”, tha Biden.

Në video-measazhin e tij, Biden rikujtoi se sot, Shqipëria dhe Shtetet e Bashkuara janë aleate në NATO dhe “partnere që punojnë së bashku për mbrojtjen e lirisë demokracisë në Evropë dhe në botë”.

Marrëdhëniet diplomatike Shqipëri-SHBA kanë nisur më 28 korrik 1922.

Këto marrëdhënie patën një ndërprerje prej 52 vitesh gjatë pushtimit italian të Shqipërisë dhe më pas regjimit komunist, që e çoi Shqipërinë në izolim të plotë.

Ato u rivendosën sërish më 15 mars 1991 me përmbysjen e regjimit dhe vendosjen e demokracisë./rel