Biden i kërkon Rusisë ta lirojë gazetarin amerikan
Autori: Gazeta inFokus 10:20 | 01 April 2023
Presidenti i Shteteve të Bashkuara të Amerikës, Joe Biden, bëri thirrje të premten që Rusia ta lirojë gazetarin e Wall Street Journal, Evan Gershkovich, i cili po mbahet i arrestuar shkaku i akuzave për spiunazh.
Tutje, Biden kundërshtoi kërkesën e bordit redaktues të gazetës amerikane për t’i dëbuar gazetarët rusë nga SHBA-ja.
I pyetur nga gazetarët e Shtëpisë së Bardhë se cili ishte mesazhi i tij për Rusinë në lidhje me Gershkovichin, i cili është shtetas amerikan, Biden tha: “Lëreni të shkojë”.
Në një artikull të botuar të enjten, bordi i redaktorëve i Wall Street Journal bëri thirrje për dëbimin e ambasadorit rus në Shtetet e Bashkuara dhe “të gjithë gazetarëve rusë që punojnë këtu”, duke e përshkruar këtë masë si “minimumi që pritet”.
“Koha e arrestimit duket si një provokim i llogaritur për ta vënë në siklet SHBA-në dhe për ta frikësuar shtypin e huaj që ende punon në Rusi”, thuhej tutje në artikullin e botuar.
Kryeredaktorja e gazetës, Emma Tucker, i dërgoi një letër stafit të gazetës të premten, duke thënë se “ne do të vazhdojmë të bëjmë gjithçka në fuqinë tonë për të siguruar lirimin e Evanit”.
“Siguria juaj është ajo që ka më shumë rëndësi për mua dhe ne do të vazhdojmë ta mbrojmë atë pavarësisht se nga ku mund të raportoni”, shtoi ajo.
Duke folur me gazetarët përpara se të nisej për të parë dëmet nga tornado në Misisipi, Biden tha se dëbimi i gazetarëve rusë “nuk ishte në plan tani”.
Gershkovich besohet të jetë gazetari i parë i huaj i arrestuar për spiunazh në Rusinë post-sovjetike dhe arrestimi i tij pritet ta përshkallëzojë konfrontimin e Kremlinit me Perëndimin shkaku i luftës në Ukrainë.
Zëdhënësi i Kremlinit, Dmitry Peskov, duke iu përgjigjur kërkesës së bordit redaktues që të gjithë gazetarët rusë të dëbohen, tha se “gazeta mund ta thotë këtë, por kjo nuk duhet të ndodhë. Thjesht nuk ka asnjë arsye për një gjë të tillë”.
Ai tha se Gershkovich ishte kapur “në flagrancë”.
Rasti “sekret”
Sipas agjencisë shtetërore ruse të lajmeve, TASS, Gershkovich i ka mohuar akuzat që rëndojnë mbi të në një seancë gjyqësore në Moskë. Ai mbetet në paraburgim deri më 29 maj, në pritje të gjykimit.
Rasti është klasifikuar si “sekret”, siç raporton TASS, që do të thotë se informacionet që mund të publikohen në lidhje me këtë rast janë të kufizuara.
Të vetmet detaje që dihen publikisht janë se agjencia ruse e sigurisë njoftoi se e kishte “pamundësuar një aktivitet të paligjshëm” duke arrestuar Gershkovichin në Yekaterinburg, rreth 1.800 kilometra larg Moskës, në një datë të panjohur për publikun.
Arrestimi i gazetarit 31-vjeçar, i cili përballet me një dënim deri në 20 vjet burgim, është një përshkallëzim serioz i cenimit të mediave nga Kremlini.
Shtëpia e Bardhë e dënoi arrestimin e Gershkovichit dhe paralajmëroi amerikanët të mos udhëtonin në Rusi, ndërsa këshilloi ata që ndodhen atje që të largohen për shkaqe sigurie.
“Shënjestrimi i qytetarëve amerikanë nga qeveria ruse është i papranueshëm. Ne dënojmë ashpër arrestimit e zotit Gershkovich”, thuhej në një deklaratë të sekretares së shtypit të Shtëpisë së Bardhë, Karine Jean-Pierre.
Zyrtarët amerikanë thanë se ishin në kontakt me familjen e Gershkovichit si dhe me gazetën dhe se Departamenti i Shtetit e kishte kontaktuar edhe Kremlinin.
Edhe një numër i qytetarëve të tjerë amerikanë janë në burg në Rusi, përfshirë këtu Paul Whelan, një ish-marins, i cili u arrestua në vitin 2018 dhe u dënua me 16 vjet burg për spiunazh – akuza që ai i mohon.
Të tjera
-
Izraeli heq vizat për Kosovën
Izraeli i ka hequr vizat për qytetarët e Kosovës. Marrëveshja është nënshk...
-
Brenda “Shotës”, si duket makina e parë shqiptare e lụftës
“Shota”, makina e parë e luftës që është prodhuar në Shqipëri, po ekspozohet ...
-
Blendi Fevziu për Sylë Tahirsylajn: Vdiq në Shqipëri, në vendin që e deshi me gjithë forcën
Gazetari Blendi Fevziu ka reaguar për vdekjen e meteorologut Sylë Tahirsylaj....
-
Borrell dorëzon raportin për mundësinë e heqjes së masave ndaj Kosovës
Përfaqësuesi i lartë i Bashkimit Evropian, Josep Borrell ka dorëzuar tek shte...
-
Bindja e Kurtit për fitore absolute në zgjedhje, kërkohet unifikim i partive opozitare
Pas deklaratave të kryetarit të Lëvizjes Vetëvendosje, njëherësh kryeministri...
-
Lajçak ka mbërritur në Kosovë, në ora 18:00 takohet me Besnik Bislimin
Zëvendëskryeministri i parë për Integrim Evropian, Zhvillim dhe Dialog i Repu...
-
Lajcak: Më është kërkuar të vazhdojë punën si emisar edhe pak, jam i bindur që Asociacioni do të bëhet
Ndonëse janë përmendur emra të ndryshëm për të pasuar në pozitën e emisarit s...
-
Haxhiu: Në dhomat e gjinekologjisë nuk do vendosen më shumë se dy lehona
Ministrja e Drejtësisë, Albulena Haxhiu ka thënë se investimet që janë bërë n...
-
Kurti fajësoi opozitën se po i shtynë zgjedhjet, Bajrami: Lojë e dështuar – do të kërkojmë llogari për mashtrimet
Deputetja nga radhët e Lidhjes Demokratike të Kosovës, Hykmete Bajrami, i ka ...
-
Klinaku – Trendafilovës: Me kanë marë e mirë, ti moti u dashtë me shku në pension
“Me kanë marë e mirë, ti moti u dashtë me shku në pension”. Kështu i ka re...
-
Hashim Thaçit dhe Kadri Veselit iu vazhdohet paraburgimi
Dhomat e Specializuara të Kosovës (DhSK) në Hagë kanë marrë vendim për vazhdi...
-
Ministria e Sveçlës blen mbi 2 milionë euro targa për regjistrim të veturave
Ministria e Punëve të Brendshme në krye me Xhelal Sveçlën së shpejti pritet t...