Lajme

Beqaj zotohet se prodhuesit vendorë do të përkrahen edhe në aspektin ligjor

Autori: Gazeta inFokus 13:31 | 18 January 2018

Ministri i Ministrisë së Inovacionit dhe Ndërmarrësisë, Besim Beqaj, në kuadër të aktiviteteve për njohjen e ndërmarrjeve që synojnë rritjen e efektshmërisë së prodhimit përmes inovacionit, ka vizituar sot fabrikën për prodhimin e qeseve plastike “Scampa”.

Pas vizitës në hapësirat prodhuese të kësaj fabrike, ministri Beqaj ka theksuar rëndësinë e përkrahjes se prodhuesve kosovarë në rritjen e prodhimit dhe ngritjen e nivelit të eksporteve.

“Është jashtëzakonisht e rëndësishme për ne që të përkrahim prodhimin vendor dhe prodhimin që shkon drejt eksportit. Unë e sigurova prodhuesin “Scampa” se përkrahja institucionale nuk do të mungojë qoftë në bazën ligjore edhe në aspekte të tjera”, tha ministri Beqaj.

-Advertisement-

Ministri Beqaj inkurajoi pronarin e fabrikës “Scampa” me rastin e fillimit të bashkëpunimit me kompani belge për prodhimin, që përfshinë inovacion të tërësishëm për kryerjen e shërbimeve.

“Ajo që më bëri përshtypje është se të gjitha mbetjet riciklohen dhe kthehen në prodhim. Për mua janë shumë me rëndësi ambiciet e kompanisë “Scampa”, shtoi ministri Beqaj.

Pronari i fabrikës “Scampa”, Kujtim Gjevori, theksoi se themelimi i kësaj fabrike ka bërë që të ndalet importi i qeseve plastike dhe që tashmë kjo fabrikë synon eksportin edhe në vendet jashtë Kosovës.

Fabrika e prodhimit të qeseve plastike “Scampa” veprimtarinë e saj prodhuese e zhvillon në Parkun e Biznesit në Drenas.