Lajme

Basha: PD nuk ka marrë kurrë financim të huaj, aq më pak me burim rus

Autori: Gazeta inFokus 11:44 | 14 September 2022

Lulzim Basha, ish-kryetar i Partisë Demokratike, ka reaguar pas lajmeve se PD-ja ka qenë një nga partitë e vendeve europiane që është financuar nga Rusia.

“Partia Demokratike nuk ka marrë kurrë asnjë financim të huaj e aq më pak me burim rus. Kur pretendime të tilla u qarkulluan në disa media, Partia Demokratike i kërkoi zyrtarisht drejtësisë hetimin e këtyre akuzave dhe bashkëpunoi plotësisht me drejtësinë e cila hodhi poshtë çdo pretendim për financime të huaja”, ka shkruar Basha në Twitter.

“Ne jemi krenarë për partneritetin e palëkundur me aleatin tonë strategjik, SHBA dhe të vendosur të ecim përpara në krah të aleatëve tanë euro-atlantikë për konsolidimin e vlerave perëndimore dhe integrimin e plotë të Shqipërisë në BE”, shton Basha në reagimin e tij.

-Advertisement-

Pas publikimit të raportit të inteligjencës amerikane, kreu aktual i Këshillit Kombëtar të PD, Edi Paloka dhe anëtari i Këshillit Kombëtar të Partisë Demokratike Genc Pollo, kërkuan transparencë mbi këto pretendime.

Më parë, Basha, ka dhënë shpjegime të ndryshme për pagesën 500 mijë dollarëshe, duke thënë në fillim se ajo u dha nga shqiptaro-amerikanët, por më pas është shprehur se “Çfarë ka bërë lobuesi dhe si e ka bërë lobuesi e di ai. Janë marrëdhënie të firmës Muzin me palë të treta”.

Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014 dhe Presidenti Putin është angazhuar në financim të fshehtë politik në mbarë botën, sipas një zyrtari të lartë amerikan, të cituar nga Zëri i Amerikës. Një raport i Komunitetit amerikan të zbulimit ka analizuar financimet e Rusisë “në mbi 24 vende gjatë viteve të fundit në një përpjekje për të manipuluar demokracitë nga brenda”, dhe siç thuhet, Shqipëria është mes këtyre vendeve.

Në deklarimet e firmës Muzin për Departamentin e Drejtësisë thuhet se pagesa ishte bërë nga Partia Demokratike. Megjithatë, shifra prej 500 mijë dollarësh figuron në kontratën me Biniattën dhe jo me PD-në, sipas revistës amerikane “Mother Jones”.

Subscribe në YouTube: GAZETA INFOKUSI
Nis bashkëpunimi serioz dhe strategjik midis Comodita dhe JYSK International
-Advertisement-

Të tjera

Fokusi

lajme