Mefail Bajqinovci, deputeti i Kuvendit të Kosovës nga radhët e VV-së ka akuzuar Komunën e Prishtinës për projektin te Liqeni i Badovcit.

Ai ka thënë se qysh nga fillimi kjo komunë e ka orientuar këtë proces drejt dhënies së lejes, shkruan gazeta inFokus.

Bajqinovci gjithashtu thotë se fajtor kryesor për këtë projekt të dëmshëm është pikërisht komuna e Prishtinës.

Ndërsa deputeti i VV-së thotë se tani Komuna po mundohet të hedhë fajin te Ministria e Mjedisit dhe Planifikimit Hapësinor, por e gjithë kjo sipas tij është një mashtrim./Gazeta inFokus/

Ky është postimi i plotë:

Prej momentit që Komuna e Prishtinës ka aprovuar kushtet ndërtimore praktikisht, e ka orientuar procesin drejtë dhënies së lejes ndërtimore për projektin e Badovcit.

Duke u mbështetur në nenet 17, 18 dhe 21 të Ligjit për Ndërtim, Komuna e Prishtinës, e ka orientuar këtë projekt drejtë pajisjes me leje me faktin që ka lëshuar akt administrativ për aprovim të kushteve ndërtimore.

Komuna e Prishtinës është fajtore kryesore sepse e ka udhëzuar këtë projekt të dëmshëm. Tani, ata po tentojnë ta hedhin fajin tek ministria për pëlqim, kjo është mashtrim. Sipas nenit 20 të Ligjit për Ndërtim dhe sipas Ligjit për Vlerësimin e Ndikimit në Mjedis, objektet banimore nuk u kërkohet vlerësim i ndikimit në mjedis.

Përgjegjësia dhe kompetencat e MMPH, përkitazi me këtë projekt, ndërlidhet me faktin se lokacioni ku planifikohet ndërtimi prekë Zonën e Mbrojtur Ujore të Liqenit të Badovcit dhe asesi nuk kanë të bëjnë këtu çështjet që lidhen me Vlerëdimin e Ndikimit në Mjedis të projektit apo Pëlqimit Mjedisor, kjo thjesht është manipulim me publikun nga Komuna.

Nga MMPH, presim që duke u bazuar në ligjet dhe udhëzimet administrative në fuqi, të sigurojë mbrojtjen e duhur të Zonës së Mbrojtur Ujore të Liqenit.

Ndërkohë dihet që kushtet ndërtimore, edhe kur ekziston plan rregullues edhe kur nuk ekziston, janë praktikisht baza themelore mbi të cilën lëshohet një leje ndërtimore. Tani jemi në kushtet që nëse Investitori aplikon për leje, me dokumentacion ndërtimor në përputhje me këto kushte ndërtimore që i ka dhënë Komuna dhe i refuzohet leja, Investitori ka të drejt të padis Komunën dhe nuk ka fuqi që e ndal këtë leje.

Prandaj, komuna e Prishtinës është mirë të bëjë publike kushtet të cilat i ka dhënë dhe të bëjë transparencën e bazës ligjore se ku është mbështetur për dhënien e kushteve ndërtimore megjithëse, në rastet kur nuk ka plan rregullativ urban, Komuna ka qenë e obliguar të njoftojë publikun dhe të mundësojë komente para se t’i ketë aprovuar kushtet ndërtimore, ashtu siç përcaktohet me nenin 18 (paragrafi 2) i Ligjit për Ndërtim.

Komuna duhet të mbahet përgjegjëse për këtë akt brutal ndaj të mirave natyrore publike.