Lajme

Babai i Diana Kastratit: Vajza ime kishte kërkuar urdhër mbrojtjeje emergjente

Autori: Gazeta inFokus 19:52 | 01 December 2022

Gëzim Kastrati, babai i të ndjerës Diana Kastrati, deklaroi se nga përvoja e hidhur që e ka pasur me rastin e vajzës së tij të ndjerë, e cila u vra nga bashkëshorti, e ka marr me shqetësim dhe dhimbje rastin e mbrëmshëm ku u vra gruaja shtatzënë.

Sipas tij, mos-intervenimi i institucioneve me kohë po lë pasoja, si në rastin e vajzës së tij, edhe në raste tjera.

“Prandaj, ne familjarët a duhet të rrimë duarkryq dhe të presim institucionet, apo të ndërmarrim çdo hap vet dhe t’u trokasim në derë duke i thënë ‘keni kujdes-keni kujdes’”, u shpreh Kastrati në emisionin Info Magazine në Klan Kosova.

-Advertisement-

Ai shtoi se vajza e tij e ndjerë, ai si prind i saj, bashkëshortja e tij dhe e tërë familja për gjashtë muaj janë marr me këtë proces para ndodhjes së rastit, pra vrasjes së Dianës dhe se vazhdimisht kanë alarmuar edhe në institucionet e rendit, në këtë rast policinë.

“Dy herë ka paraqitur kërkesë për mbrojtje vajza ime. Nuk ka pasur dhënie të përgjegjësisë, absolut jo. Urdhër mbrojtja e rregullt edhe ajo emergjente dallojnë prej natyrës. Përveç asaj të rregullt, vajza ime ka kërkuar urdhër mbrojtjeje edhe emergjente me të cilën 24 orë është dashur të ndërmerret masa e mbrojtjes”

“Vajza ime kishte alarmuar institucionet, prandaj unë e kam ngritur një padi ndaj shtetit, ndaj institucioneve te këtij vendi, dhe ende sot merrem me gjykata për mos kryerjen e këtij rasti. Unë e kam ngritur zërin që atëherë”, sqaroi babai i të ndjerës Diana Kastrati, Gëzimi.

Subscribe në YouTube: GAZETA INFOKUSI