Kandidati i Demokratëve për Drenasin, Driton Ajazin, i është kundërpërgjigjur kundërkandidatit tjetër për Drenasin, i cili vjen nga Partia Demokratike e Kosovës, Ramiz Lladrovci.
Ajazi në një postim të gjatë ka pohuar serish se Ramiz Lladrovci, është dëshmitar i Gjykatës speciale, shkruan Gazeta Infokus.
Ai pos tjerash ka demantuar se ai dhe bashkëpunëtorët e tij, kanë dëmtuar ndonjëherë ish Presidentin Hashim Thaçi dhe ish kryetarin e PDK-së, Kadri Veseli, por as Jakup Krasniqin e Rexhep Selimin të cilët tash e sa kohë po mbahen në Hagë.
Kujtojmë që ka disa ditë që Lladrovci e Ajazi, janë duke argumentuar me statuse në Facebook, ndaj njëri tjetrit.
Ajazi e Lladrovci, janë në garë për të fituar postin e të parit të Drenasit, në balotazhin e 14 nëntorit.
Postimi i plotë:
“Fajet nuk i ka pasqyra, por fytyra.
Profesori Hajredin Kuçi shpesh e përsëriste këtë frazë kur u kundërpërgjigjej shpifjeve të ulta, sikur ato të thëna në reagimin e një grushti njerëzish të PDK-së, meqë e dimë se shumë anëtarë kryesie nuk pajtohen me atë përmbajtje.
Për herë të parë e shofim një reagim të tillë linçues e të ndikuar nga të pavërtetat.
Jo! Ne as dje, as sot e as nesër nuk i kemi dëmtuar liderët historikë që i kemi: Presidentin Hashim Thaçi e Kryetarin Kadri Veseli, por as bashkëluftëtarët e tyre – Jakup Krasniqin e Rexhep Selimi.
Po! Ramiz Lladrovci është dëshmitar i Gjykatës Speciale. Ai vet e ka kumtuar këtë lajm dhe hiç më larg se mbrëmë ka treguar në një televizion se gati gjatë gjithë një dite ka dhënë dëshmi.
Pra, nëse çlirimtarët tjerë janë ftuar në statusin e të dyshuarit, Lladrovci është ftuar si dëshmitar. Është fakt që s’mund ta shemb askush, sado që ju dhemb.
Për më keq, iu bë një aktë i ultë z.Thaçi këto ditë vetëm që të përfitohet për fushatë elektorale.
Dhe, ne me të drejtë druajmë se ky keqpërdorim që u bë për qëllime elektorale, do ta dëmtojë edhe z.Thaçi e edhe z.Selimi në procesin që kanë para vetes për mbrojtje në liri, nisur nga premisa se një dëshmitar thotë se është telefonuar nga ta.
Jo! Ne kurrë nuk i kemi dëmtuar, nuk i kemi shantazhuar e as akuzuar as z.Thaçi e as z.Selimi.
Po! Është shumë lehtë ta konstatojë secili qytetar se shantazhuesi e akuzuesi është Ramiz Lladrovci, ai që ka dëshmuar në Speciale.
Mjafton t’i lexoni letrat kërcënuese të Lladrovcit, të nënshkruara nga ai kundër z.Thaçi. Janë të qasshme. Janë dëshmi në vete.
Mjafton t’i lexoni titujt e mediave për akuzat që Lladrovci i bën kundër z.Rexhep Selimi.
Mjafton t’i lexoni artikujt me akuzat e panumërta të Lladrovcit kundër bacës Jakup.
Dhe, sot, z.Thaçi, z.Selimi e z.Krasniqi janë në paraburgim, e Lladrovci dëshmitar.
Pra, kjo është fytyra e Lladrovcit. Dhe, ne jemi pasqyra që po tregojmë se kush vërtetë është ai. Dhe ne nuk kemi thënë asgjë më tepë se sa keto që qarkullojnë çdo dite në media dhe rrjete sociale!
Kthjelluni e shiheni kë jeni duke e mbështetur.
Se përjashtojmë mundësinë që edhe reagimin kundër nesh e keni bërë nën shantazhin dhe presionin e z.Lladrovci. Por, kjo nuk mund t’ua justifikojë shpifjet e ulëta.
Unë, kam qenë po i njëjti edhe atëherë kur kam qenë pjesë e PDK-së më tepër se një dekad, po ai jam edhe tani dhe do vazhdoj të jem i njëjti. Une nuk jam në garë kundër PDK-së, por jam në garë kundër një individi që e ka katandisur Drenasin tash e 5 vite.
Qytetari i Drenasit ka vendosur të çlirohet prej tij, prandaj ia dha ndëshkimin më 17 tetor. E, më 14 nëntor do ta rrënojë përfundimisht karrierën e tij politike. Me nderime, Driton Ajazi”, ka shkruar Driton Ajazi në Facebook./Gazeta Infokus/