Komuna e Prishtinës ka vazhduar edhe në vitin që lamë pas angazhimin e personave me kontrata për shërbime të veçanta.

Vetëm gjatë vitit të kaluar kjo komunë ka punësuar 210 zyrtarë me kontratë për shërbime të veçanta që duket një reduktim i lehtë i personave të angazhuar me këtë kontratë nga viti 2015 kur kjo komunë kishte angazhuar 276 persona në formë të tillë.

Sipas raportit të Zyrës Kombëtare të Auditimit, mbulimi i pozitave të rëndësishme me marrëveshje të përkohshme rezulton me performancë të dobët dhe rrit pasigurinë nëse personeli i angazhuar është jo adekuat.

“Sipas regjistrit të pagesave, gjatë këtij viti janë angazhuar 210 zyrtarë me kontratë për shërbime të veçanta që paraqet një numër të reduktuar nga viti i kaluar, 276”, thuhet në raportin e ZKA-së.

Auditori Gjeneral kërkon nga kryetari i Komunës, Shpend Ahmeti, që t’i rishikojë nevojat reale për angazhim të punëtorëve me kontratë për shërbime të veçanta, shkruan Insajderi.

“Kryetari duhet t’i rishikojë nevojat reale për angazhim të punëtorëve me kontrata për shërbime të veçanta. Nevoja për staf shtesë për pozitat e karrierës duhet të analizohet dhe nëse rritja e numrit të stafit është e domosdoshme, kjo të inkorporohet edhe në planifikimet buxhetore”, thuhet në raportin e ZKA-së.

Sipas raportit në regjistrin komunal theksohet se personat e punësuar janë angazhuar si zyrtar në zyrat e gjendjes civile, zyrtarë në kuzhinën e institucioneve parashkollore, zyrtarë për legalizim, zyrtarë tjerë në urbanizëm, zyrtar i kulturës, zyrtarë inspekcioni, regjistrues të ndërtimeve pa leje, anketues të tatimit në pronë, performues të festave dhe të tjerë

Lidhur me punësimet e Komunës së Prishtinë me kontrata për shërbime të veçanta gjatë vitit të kaluar kishte pasur kritika të shumta për kryetarin e saj.

Ish-kryetari i Komunës së Prishtinës, Ismet Beqiri, në mars të vitit të kaluar kishte thënë se Lëvizja Vetëvendosje ka punësuar 300 persona me shërbim të kontratave të veçanta, duke shtuar se LDK-ja gjatë 13 vjetëve qeverisje nuk ka punësuar asnjë.

“Fillimi i punës është bërë me etiketime dhe njollosje. Lëndët në prokurori i takojnë prokurorit e jo kryetarit të Komunës. Afër 300 me kontratë me vepër, e ne asnjë në të gjitha mandatet. 37 janë futur në Ndërmarrjen Publike Banesore”, kishte thënë Beqiri.

Diplomon gjenerata e dytë e studentëve UNIK të UNI-të me diploma të fuqizuara nga Arizona State University

Sponsoruar