Lajme

Ata që dënonin shqiptarët në procese të montuara mbeten prokurorë e gjykatës në Serbi

Autori: Gazeta inFokus 08:02 | 27 July 2017

Të njëjtit njerëz që kanë shqiptuar verdikte politike kundër shqiptarëve në vitet 1998-2000, duke shkelur kështu normat profesionale, sot janë në pozita të larta në gjyqësorin e Serbisë, ka thënë avokati Mihajlo Pavloviq, nga Fondi për të Drejtën Humanitare.

“Në mesin e tyre janë, shembull, edhe kryetari i Gjykatës Supreme të Kasacionit, sikur edhe një numër i madh i gjyqtarëve të atij gjyqi, që edhe sot gjenden në ato pozita. Disa prej prokurorëve që asokohe i ngrinin ato aktakuza kanë përfunduar në Prokurorinë për Krime Lufte”, ka theksuar Pavloviq, raporton Radio Evropa e Lirë, shkruan sot “Koha Ditore”.

Fondi për të Drejtën Humanitare ka prezantuar në Beograd një raport për proceset e montuara kundër 2.050 shqiptarëve të Kosovës, që janë udhëhequr nëpër gjykatat e Serbisë në periudhën prej vitit 1998 deri më 2000, kur këto përmbyllen me amnistinë e shpallur nga Qeveria e Serbisë në vitin 2001 dhe 2002.

-Advertisement-

Në dosjen e titulluar “Të gjykosh i pandëshkuar” janë dhënë shembuj të keqpërdorimit politik të drejtësisë në Serbi. Shqiptarët janë akuzuar për bashkim me qëllim të “veprimtarisë armiqësore dhe terrorizmit” pa dëshmi të vlefshme. Të gjitha gjykimet dhe aktgjykimet i ngjanin njëra-tjetrës dhe bëheshin sipas matricave të njëjta, thuhet në raportin e Fondit për të Drejtën Humanitare, bashkëpunëtorët e të cilit kishin qasje në rreth dhjetë mijë faqe dokumentesh nga arkivat e gjykatave në Serbi.

Subscribe në YouTube: GAZETA INFOKUSI