Lajme

Arrestohet një serb në Leposaviq, dyshohet për tregti të ndaluar

Autori: Gazeta inFokus 14:42 | 06 June 2023

Policia e Kosovës ka njoftuar se mëngjesin e sotëm, ka arrestuar një person në fshatin Dobravë të Leposaviqit, nën dyshimin për tregti të ndaluar.

“Policia kufitare vazhdon aktivitetet e tyre në luftimin e kriminalitetit nder-kufitar. Zyrtarë policorë nga Drejtoria Rajonale e Policisë Kufitare-Veriu, gjatë realizimit të detyrave e aktiviteteve të tyre në parandalim të veprimtarisë penale, më 06.06.2023, rreth orës 07:05, në fshatin Dobravë të Leposaviçit, pasi kanë identifikuar një veturë të dyshimtë, të njëjtën kanë arritur ta ndalin për kontroll’, thuhet në njoftim.

Në njoftim thuhet se patrulla policore e kufirit, gjatë kontrollit të veturës të cilën e drejtonte një shtetas i Republikës së Kosovës i nacionalitetit serb, kanë hasur një sasi të mallrave të cilat dyshohet se nuk kanë kaluar nëpër procedura doganore.

-Advertisement-

“Në automjet kishte kryesisht mallra ushqimore (produkte me origjinë shtazore), të cilat dyshohet se drejtuesi i veturës, i kishte futur në vendin tonë nga territori i Serbisë përmes rrugëve ilegale. Policia në koordinim me prokurorin kanë iniciuar rastin ‘tregti e ndaluar”, thuhet në njoftim.

Bëhet e ditur se i dyshuari dhe vetura është dërguar në terminal doganor për procedura tjera.