Gjykata e Apelit ka aprovuar ankesat e mbrojtësve të të pandehurve Skender Gjeli, Halil Topalli, Mendrit Topalli, Fadil Topalli, si dhe të miturit L.T., duke e kthyer në rivendosje aktvendimin e Gjykatës Themelore në Prishtinë për caktimin e paraburgimit të dyshuarve të përfshirë në një incident në qendër të Drenasit më 17 shkurt ku 6 veta kishin mbetur të plagosur.

Lajmin për KALLXO e bëri të ditur Nasuf Hasani, avokat i të pandehurit Faton Topalli.

Sipas aktvendimit, Apeli ka gjetur se ankesat e avokatëve mbrojtës janë të bazuara me arsyetimin se aktvendimi i shkallës së parë ka pasur shkelje esenciale te dispozitave ligjore.

Deri te ky vendim i Apelit ka ardhur me arsyetimin se prokurori nuk ka dhënë arsye të mjaftueshme për caktimin e masës së paraburgimit ndaj të pandehurve.

“… pa cekur konkretisht se cilat janë arsyet mbi të cilat ekziston rreziku që të pandehurit po të gjenden në liri, do të mund të ikin apo të arratisen, për t’iu ikur përgjegjësisë penale si dhe pa cekur konkretisht shkaqet që merren parasysh, ardyet mbi të cilat ekziston rreziku që të pandehurit po të gjenden në liri do të mund të përsërisin veprën penale”, thuhet më tej në aktvendim.

Të pandehurit mbeten nën masën e paraburgimit deri në marrjen e një vendimi të ri.

Shkalla e parë i kishe caktuar masën e paraburgimit në kohëzgjatje prej një muaji.

Incidenti për të cilin po dyshohen shtatë personat ndodhi më 17 shkurt në qendër të Drenasit, rreth orës 16:30, ditën kur Kosova po shënonte 10 vjetorin e shpalljes së pavarësisë.

I pandehuri Skender Gjeli po përballet me dyshimet për veprën penale vrasje e rëndë në tentativë, derisa 6 të tjerët, Halit Topalli, Shaip Topalli, Fadil Topalli, Arbenit Topalli dhe i mituri L.T., me veprën penale lëndim i rëndë trupor.

Përveç veprës penale të vrasjes së rëndë në tentativë, Gjeli po dyshohet edhe për armëmbajtje pa leje.

Në kërkesën për masën e paraburgimit të cilën e kishte siguruar KALLXO.com, sipas arsyetimit të Prokurorisë, ekziston dyshimi i bazuar se më 17 shkurt, rreth orës 16:22, në rrugën “Xhevat Demaku”, në Drenas, saktësisht në udhëkryqin që lidhet me rrugët tjera, derisa të pandehurit Halit Topalli, Shaip Topalli, Mendrit Topalli, Fadil Topalli, Arbenit Topalli dhe L.T., kanë qenë duke lëvizur me veturat e tyre në drejtim të shtëpisë së shëndetit, i ka vërejtur Skender Gjeli dhe ka vrapuar disa metra pas veturës së funit të tipit “BMË”.

Më tej, prokuroria pretendon në atë moment janë ndalur të tri veturat, ndërsa i pandehuri Skender Gjeli me të arritur te xhami i derës së parë, të anës së djathtë, ka shtënë me revolen e tipit “Glock”.

Aeroporti “Adem Jashari” ka një kërkesë për udhëtarët që kanë humbur valixhet e tyre

Sponsoruar