Analistët politikë: Qeveria Kurti pa program të qartë, po synohet përçarja e opozitës
Autori: Gazeta inFokus 12:18 | 25 May 2024
Qeverinë aktuale të Kosovës, analistët e përshkruajnë me një notë kaluese shumë të dobët, pa një program të qartë, objektivë dhe fokus. Sipas analistëve, kryeministri Kurti më shumë se shkuarja në zgjedhje, i intereson përçarja e opozitës në mënyrë që të mos ketë një frymë të fuqishme e cila do ta dëmtonte në kuptim të numrave.
Ndërsa, rreth qasjes së opozitës për zgjedhje, ata e komentojnë se ka filluar të shkojë në drejtim të gabuar, sepse në vend që të sulmojë dhe kritikojë për të rrëzuar qeverinë si zakonisht, tashmë ka filluar një luftë e brendshme ndërmjet opozitës duke kritikuar njëra-tjetrën se po i bënë favore pushtetit.
Sipas analistit e profesorit universitar, Rrahman Paçarizi, kryeministri i Kosovës, Albin Kurti me një veprim finok ka arritur që ta orientojë energjinë e opozitës në një luftë të brendshme ndërmjet vete në vend se ajo luftë të bëhej kundër Qeverisë.
“Qasja e opozitës për zgjedhje mendoj që ka nisur të shkojë në drejtim të gabuar sepse në vend se opozita të orientohet aty ku normalisht orientohet për ta sulmuar, kritikuar dhe për ta rrëzuar Qeverinë, tashmë ka filluar një luftë e brendshme ndërmjet opozitës duke e kritikuar njëra-tjetrën se po i bënë favore pushtetit dhe unë mendoj se Kurti me një veprim finok, inteligjent ka arritur që ta orientojë, ta kanalizojë energjinë e opozitës në një luftë të brendshme ndërmjet vete në vend se ajo luftë të bëhej kundrejt Qeverisë. Kurtit më shumë se shkuarja në zgjedhje i intereson paraprakisht përçarja e opozitës në mënyrë që të mos ketë një frymë të fuqishme e cila do ta dëmtonte në kuptim të numrave. Fakti që opozita e ka pranuar këtë lojë të pushtetit është mjaft i dëmshëm për të mos garantuar një sukses apo për të mos ndryshuar asgjë edhe në rast se mbahen zgjedhjet në fund apo fillim të muajit të ardhshëm”, ka thënë Paçarizi.
Ndërsa, analisti tjetër politik, Dritëro Arifi, ka thënë për KosovaPress se opozita përveç deklaratave në rrjete sociale dhe konferencë për shtyp nuk ka pasur ndonjë lëvizje tjetër më serioze për ta lëkundur pozitën e qeverisë.
“Opozita realisht nuk ka ndonjë qasje serioze kritike ndaj LVV-së apo Qeverisë aktuale sepse po hymë në vitin e katërt dhe nuk është që kemi pa ndonjë organizim të mirëfilltë për ndonjë qëndrim të politikës kosovare për të cilat kemi pasur shumë lëkundje me partnerët ndërkombëtarë. Opozita përveç deklaratave në Facebook dhe ndonjë konferencë për shtyp, e cila nuk e ka megjithatë qytetarin e zakonshëm, nuk ka pasur ndonjë lëvizje tjetër më serioze për ta lëkundur pozitën e qeverisë. Fjala dështim është fjalë shumë e rëndë por mund të themi se ka një notë kaluese shumë të dobët, kështu e kisha përshkruar Qeverinë Kurti, pa një program të qartë pa një objektiv dhe fokus dhe po vërehet se projektet e mëdha nuk i kemi parë dhe jam i bindur që nuk do ti shohim deri në fund të këtij mandati që kanë mbetur maksimumi dhe gjashtë muaj”, ka shtuar Arifi.
Tema e zgjedhjeve të parakohshme në Kosovë është riaktualizuar pas takimit në mes kryeministrit Albin Kurti dhe kreut të PDK-së, Memli Krasniqi, takim ky që ndodhi pas ftesës së shefit të ekzekutivit ndaj krerëve të partive opozitare, por që u refuzua nga LDK e AAK.
Krasniqi, i cili ishte i vetmi nga opozita që iu përgjigj ftesës së Kurtit për të diskutuar agjendën legjislative, kishte thënë se zgjedhjet janë të domosdoshme.
Ai tha se PDK-ja është e gatshme të gjejë dakordim me të gjitha partitë parlamentare për të shpërndarë Kuvendin “përmes një mocioni të përbashkët”.
Ndërkaq, Lidhja Demokratike e Kosovës, përmes një komunikate për media, të lëshuar më 14 maj, kishte thënë se nuk do të bëhet pjesë e asnjë “marrëveshjeje të pre-aranzhuar prapa dyerve të mbyllura e darkave”.
Dorëheqjen apo shkarkimin e kryeministrit Kurti e kërkoi edhe partia tjetër në opozitë, Aleanca për Ardhmërinë e Kosovës.
Data për mbajtjen e zgjedhjeve caktohet nga presidentja e vendit, pas konsultimeve me partitë politike. Kjo ndodh pasi të shpërndahet Kuvendi.
Në bazë të kalendarit zgjedhor zgjedhjet e ardhshme parlamentare do të duhej të mbaheshin në vitin 2025.
Të tjera
-
Sveçla i pakënaqur me aktakuzën e Prokurorisë Speciale për Banjskën, çuditet që s’janë përfshirë zyrtarë të Serbisë
Orët e para të se dielës së 24 shtatorit të vitit 2023, Policia e Kosovës u s...
-
Vuçiqi e lidh Kurtin me pro*testat e shqiptarëve në Luginë
Presidenti i Serbisë, Aleksandar Vuçiq, ka komentuar protestën e qytetarëve s...
-
Kosova pjesë e marrëveshjes së ShBA-së për inteligjencë artificiale
Ministrja e Jashtme e Kosovës, Donika Gërvalla ka marrë pjesë në lansimin e m...
-
Alarmon zyrtari i PDK’së, këto janë pasojat e përjashtimit të mundshëm nga CEFTA
Arben Mustafa, “ministër” në hije i financave nga Partia Demokratike e Kosovë...
-
Parashikimi i motit për të martën
Për të martën parashikohet të mbajë mot me vranësira dhe intervale me diell, ...
-
Erdogan, Vuçiqit: I rëndësishëm vazhdimi i dialogut me Kosovën
Presidenti i Turqisë Rexhep Erdogan është takuar me presidentin e Serbisë Ale...
-
Komuna e Prishtinës në pritje të votimit të buxhetit për vitin 2025
Kuvendi i Prishtinës nuk ka arritur ende ta miratojë buxhetin për vitin 2025....
-
Valon Syla i reagon ashpër Gold AG: Ti je prindi zero
Reperi, Arian Agushi i njohur me nofkën “Gold AG” ishte i ftuar sonte në emis...
-
“Dështova”, zbulohet letra që shkroi atentatori i Donald Trump
Personi i cili tentoi të eliminonte kandidatin republikan për president Donal...
-
Ia vendosën bllokadën pasi nuk e pagoi parkingun, qytetari në Vushtrri bën veprim të pazakontë!
Komunat e Kosovës kanë nisur aplikimin e pagesave për përdorimin e hapësirave...
-
Rohde pas takimit me Orav: Pres që bashkërisht ta sjellim Kosovën më afër Bashkimit Evropian
Shefi i Zyrës së Bashkimit Evropian në Kosovë, Aivo Orav, është takuar sot me...
-
“Fatonin e vrau shteti”: Nëna e tij kritikon Bislimin dhe Haxhiun
Shehrije Hajrizi, nëna e Faton Hajrizit, deklaroi se të birin ia vrau shteti....