Lajme

Ambasadori Zemaj takohet me të Dërguarin e posaçëm të kryeministrit të MB-së për Ballkanin Perëndimor

Autori: Gazeta inFokus 20:05 | 09 June 2022

Ambasadori i Republikës së Kosovës për marrëdhënie me NATO-n, Astri Zemaj, është takuar sot me të Dërguarin e posaçëm të kryeministrit të Mbretërisë së Bashkuar për Ballkanin Perëndimor, Marshallin e Forcave Ajrore, Sir Stuart Peach.

Zemaj ka bërë të ditur se nga ky takim pune është diskutuar mbi pozicionin e Kosovës si faktor për paqe e stabilitet në Ballkanin Perëndimor, sidomos tani në zhvillimet e fundit në luftën në Ukrainë.

“Po ashtu vlerësim maksimal për te arriturat si dhe për pozicionimin e qartë të Republikës së Kosovës si faktor dhe partner kredibil për paqe, stabilitet dhe siguri ne Ballkanin Perëndimor, sidomos në këto kohë të vështira kur kërcënimet dhe sfidat nga akterë të ndryshëm (shtetërorë dhe jo shtetërorë në botë) kanë krijuar një mjedis gjithnjë e më të paqëndrueshëm të sigurisë globale” shkroi Zemaj në Facebook.

Tutje, ambasadori Zemaj bëri me dije edhe vullnetin e të dy paleve për thëllim të bashkëpunimit mes dy shteteve.

“Prandaj, jemi krenar dhe mirënjohës për ecjen e përbashkët në proceset e mëtutjeshme për forcimin e subjektivitetit ndërkombëtar të vendit tonë, si dhe të përkushtuar në thellimin e marrëdhënieve bilaterale në mes të Mbretërisë së Bashkuar dhe Republikës së Kosovës” përfundoi ai.

Takimi u organizua me ftesë të Misionit të Përhershëm të Mbretërisë së Bashkuar në NATO.

Të tjera