Fokus

Albin Kurti i vetëm ka më shumë vota se krejt kabineti i Avdullah Hotit

Autori: Halil Berisha 11:42 | 04 June 2020

Pas afër 50 ditësh qeverisje, Albin Kurti, bashkë me kabinetin e tij, u rrëzua në Kuvendin e Kosovës.

Tash, këtë të mërkurë, Kosova u bë me Qeveri të re, e cila udhëhiqet nga Avdullah Hoti, shkruan gazeta inFokus.

Ky ndërrim qeverie u bë pa shkuar në zgjedhje, gjë që edhe u kundërshtua nga Vetëvendosje e Albin Kurtit.

-Advertisement-

E nëse shihen rezultatet e zgjedhjeve të 6 tetorit, krejt kabineti i ri qeverisës i Avdullah Hotit, i cili përbëhet nga LDK, AAK, NISMA e Lista Serbe, kanë 157 mijë e 265 vota, shkruan gazeta inFokus.

Kryeministri Hoti ka 26 mijë e 94 vota.

Zëvendëskryeministrat Besnik Tahiri ka marrë 5 mijë e 247 vota, Driton Selmanaj ka 16 mijë e 222 vota e Albulena Balaj ka 4 mijë e 22 vota, ndërsa Goran Rakiq pjesë e Listes Serbe që është edhe zëvendës kryeministër dhe ministër i Pushtetit Lokal, nuk ka asnjë votë pasi nuk kishte dalë në zgjedhje.

Njëjtë, në zgjedhje, për të marrë votat e qytetarëve, nuk kishin dalë as ministri tjetër nga Lista Serbe, Dalibor Jevtiq dhe ministrat tjerë, Agim Veliu, Ramë Likaj, Selim Selimi dhe Meliza Haradinaj.

E Blerim Kuçi, ministër i Ekonomisë dhe Ambientit ka 5 mijë e 511 vota, ndërsa Hykmete Bajrami, ministre e Financave ka 8 mijë e 344 vota, shkruan gazeta inFokus.

Ministri i Bujqësisë, Besian Mustafa, ka 18 mijë e 350 vota e ministrja e Kulturës, Vlora Dumoshi, ka marrë 5 mijë e 909 vota.

Anton Quni, ministër i Mbrojtjes ka marrë 31 mijë e 731 vota, ndërsa Armend Zemaj, ministër i Shëndetësisë ka marrë 10 mijë e 567 vota, derisa Skënder Reçica, ministër i Punës dhe Mirëqënies Social ka 3 mijë e 602 vota.

E Enis Kervan, ministër i Zhvillimit Rajonal ka marrë 1 mijë e 575 vota, shkruan gazeta inFokus.

Nga kjo i bie që tanimë ish-kryeministri, Albin Kurti, që kishte marrë 183 mijë e 952 vota, ka për 26 mijë e 687 vota më shumë se kryeministri i tanishëm Avdullah Hoti, bashkë me 19 anëtarët e kabinetit të tij.

E vota më shumë se Hoti bashkë me krejt kabinetin, ka edhe Vjosa Osmani e LDK-së, e cila më 6 tetor ka marrë 176 mijë e 16 vota, apo 18 mijë e 751 vota më shumë./Gazeta inFokus/

Subscribe në YouTube: GAZETA INFOKUSI

Të tjera

Fokusi

fokus