Problemet në Trepçë vetëm sa janë thelluar. Përveç telasheve madhore e të një pas njëshme me pagat tani minatorët po përballen edhe me shpëkutje të energjisë elektrike për shkak të mos pagesës.

Tash e më shumë se 7 ditë Kompleksi i Minierave në Kishinicë dhe Artanë kanë mbetur pa energji elektrike.

Kështu ka deklaruar, deputeti i Partisë Demokratike të Kosovës, Ferat Shala në Podcast me Shkelzen Dakaj.

Deputeti i cili për katër vite drejtoi “Trepçën ”ka alarmuar për gjendjen në këtë ndërmarrje duke thënë se janë miliona euro që kanë mbetur të bllokuara nga përmbaruesi, arsyeja pse minatorët janë përballur disa herë me vonesa të pagave, shkruan Gazeta Infokus.

“Sot kur ne po e bëjmë këtë intervistë, sot në Kompleksin e Minierave në Kishnicë dhe Artanë tash e shtatë ditë janë pa energji elektrike sepse është shkëput për shkak të mospagesës. Sot 7 ditë kompleksi i Kishincës është pa energji. Sot kur po flasim në Trepçë përmbaruesit janë duke pritur ti bllokojnë të gjitha kontot e Trepçës janë miliona euro që presin me përmbarues të ekzekutohen dhe e kanë problem liferimin e pagave për minatorët”, ka thënë deputeti.

Problemet në Trepçë kanë qenë të vazhdueshme. Kjo ani pse Kryeministri i Kosovës, Albin Kurti para se të vinte në pushtet ishte zotuar se do të siguronte një model të ri të qeverisjes së resurseve minerare, duke premtuar kështu ringritjen dhe avancimin e tyre.

Ai kishte premtuar edhe futjen e teknologjisë së re, për të zhvilluar metalurgjinë, por le që një gjë e tillë nuk ndodhi mirëpo siç duket tani problem është bërë edhe furnizimi me energji elektrike.

Minatorët e ndërmarrjes “Trepça”, po vazhdojnë të hasin në sfida të njëjta, duke pasur vonesa me marrjen e pagave me kohë e me kushte të vështira e shumë sfiduese të punës.

Disa herë minatorët kanë hyrë në grevë për shkak të vonesave me pagat. Në muajin qershor, greva e minatorëve zgjati më shumë se një javë.

Në atë kohë njëri nga grevistët kishte deklaruar për Infokus se i duhet të lë punën në minierë pasi kishte dy muaj që nuk kishte marrë pagë dhe se nuk kishte çfarë tu dërgonte fëmijëve në shtëpi.

“Po ia dalim për faqe të zezë, qysh me ia dal kur nuk kom çka me iu qu fëmijëve te shpija”, kishte thënë ai ndër të tjera.

Kompleksi metalurgjik Trepça, deri në vitet ’90 kur edhe ishte përkeqësuar situata politike, është llogaritur si një prej ndërmarrjeve më të mëdha jo vetëm në Kosovë, por edhe në territorin e Jugosllavisë së atëhershme.

Me rreth 20.000 punëtorë, kjo ndërrmarrje është cilësuar si shtylla kryesore e ekonomisë së Kosovës dhe ish-Jugosllavisë.

Sipas të dhënave të institucioneve të Kosovës, nga viti 1945 deri në periudhën para vitit 1990, nga minierat e Trepçës janë nxjerrë rreth 600 mijë tonë xehe në vit./Gazeta Infokus

BKT Kosova synon të rrisë ndërgjegjësimin lidhur me çrregullimet e spektrit të autizmit në Ditën Botërore të Ndërgjegjësimit për Autizmin

Sponsoruar