Incidentet e mbajtja e armëve të ftohta nga nxënësit në shkolla është shndërruar në një problem serioz në vend. Vetëm në 5 mujorin e parë të vitit 2021 janë regjistruar 66 raste të lëndimit të lehtë trupor në shkolla dhe në afërsi të tyre.

E ajo që mbetet shqetësuese është posedimi i armëve të zjarrit dhe armëve të ftohta nga nxënësit në shkolla. Sipas të dhënave që Gazeta Infokus ka siguruar nga policia e Kosovës, nga janari deri në maj të këtij viti në shkolla janë konfiskuar pushkë, pistoleta e thika.

Në këtë periudhë kohore, sipas të dhënave që Infokusi ka marrë nga Policia thuhet se janë identifikuar 8 raste të posedimit të armëve të zjarrit, 48 raste të posedimit të armëve të ftohta dhe 29 raste të dëmtimit të pronës.

-Advertisement-

Derisa të pyetur se çfarë është duke ndërmarrë policia e Kosovës që të ulet numri i këtyre rasteve nga policia për Infokus kanë thënë se është hartuar dhe është zbatuar Urdhëri Operativ “’Siguria në shkolla & Stop drogave në shkolla” në të cilin parashihen detyra e aktivitete konkrete për zyrtarët policorë të përfshirë në zbatim të këtij urdhri.

“Qëllimet kryesore që policia ka synuar dhe synon t’i arrijë me hartimin dhe zbatimin e këtij urdhri, ndër të tjera janë edhe: krijimi i një klime më të sigurt për nxënësit, personelin arsimor në të gjitha nivelet arsimore, bashkërendimi i aktiviteteve ndër-institucionale, parandalimi dhe zvogëlimi i incidenteve në shkolla dhe objekte e rrethinë afër shkollave.

Po ashtu plani parasheh parandalimin, identifikimin dhe arrestimin e personave të dyshuar si dhe marrjen e masave ndaj personave që nuk janë nxënës, e që sillen afër shkollave dhe në hapësira të shkollave”, thuhet në përgjigjen e policisë për Infokus.

Kujtojmë se muajin e kaluar policia e Kosovës pas një aksioni në afërsi dhe në shkollat e Ferizajt kishte konfiskuar një arsenal armësh, ku ndër to përfshiheshin pistoleta, pushkë e thika, shkruan Gazeta Infokus.

Në aksionin e zhvilluar në Ferizaj policia pati konfiskuar pesë pistoleta dhe dy armë të gjata gjysmë automatike.

“Janë konfiskuar: 5 armë zjarri (pistoleta), 2 armë të gjata gjysmë automatike, sasi e municionit, 40 thika, kryesisht të nxënësve të shkollave të mesme, 10 boksa metali të nxënësit e shkollave të mesme, 6 mullinj për bluarje të marihuanës, 4 shufra metali, dhe 1 elektro shok”, thuhej në njoftimin e Policisë. /Gazeta Infokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-