Lajme

AKR-ja kërkon rinumërim të të gjitha votave në Prishtinë

Autori: Gazeta inFokus 12:42 | 24 October 2021

Kandidati i Aleancës Kosova e Re (AKR) për kreytar të Prishtinës në zgjedhjet e fundit lokale, Gëzim Mehmeti ka kërkuar të rinumërohen të gjitha votat në këtë komunë.

Përmes një konference për media, Mehmeti tha se ka pasur manipulime me vota të cilat e kanë dëmtuar AKR-në me 1.2%.

“Disa individë kanë abuzuar me këto zgjedhje, dhe AKR-ja është dëmtuar me 1.2%. Ne kemi prova dhe edhe pse nuk janë rezultatet preliminare, po ju jap disa shembuj ku është abuzuar me votat e partisë tonë”, tha Mehmeti, duke deklaruar paraprakisht se qytetarët kanë treguar kulturë të lartë të zgjedhjeve.

-Advertisement-

Ai tha se provat do t’i paraqesin në Panelin Zgjedhor për Ankesa dhe Parashtresa.

“Kërkesa jonë është që në Prishtinë te të gjitha vendvotimet të shkojnë në rivotim duke pasur parasysh provat që kemi. Ne si subjekt politik do t’i paraqesin provat tona në PZAP, por edhe ankesa individuale. AKR-ja, pra, kërkon rinumërim të votave në të gjitha vendvotimet”, u shpreh Mehmeti.

Subscribe në YouTube: GAZETA INFOKUSI