Ndonëse rreth 600 punonjës në Qendrën e Numërimit dhe Rezultateve janë duke punuar 24 orë pa ndërprerë, ende nuk dihet se kur do të përfundojë numërimi i votave. Koordinatori i QNR-së, Burim Ahmetaj, ka thënë për “Zërin” se janë duke punuar në tre ndërrime, 24 orë pa ndërprerë, që ky proces të përfundojë sa më parë. Sipas tij, deri më tani rreth 50 për qind e materialeve të formularëve të rezultateve janë procesuar në bazën e të dhënave mirëpo, siç shprehet ai, ende ka punë për t’u bërë.

“Jemi në procesin e punës, mirëpo kemi edhe shumë procese të tjera. Pra, është duke u përgatitur raporti i auditimit, po ashtu e kemi raportin e karantinës, do t’i kemi skanimin e votuesve të rregullt, regjistrimin e votuesve me kusht dhe numërimin e votave me kusht”, ka thënë Ahmetaj. Ai ka shtuar se gjithë këto procese duhet të kompletohen dhe pasi të kompletohen të gjitha këto do të mundë t’i kenë edhe rezultatet nga QNR-ja, të cilat Komisioni Qendror i Zgjedhjeve do t’i shpallë. “Pra, nuk mund të themi se mund të kryhen shumë shpejt, nuk mund të themi që mund të kryhen brenda disa ditëve, mirëpo QNR-ja do t’i bëjë të gjitha përpjekjet në tre ndërrime, në 24 orë, në mënyrë që sa më parë të kryhen të gjitha këto procese”, ka deklaruar Ahmetaj.

Sa i përket mbarëvajtjes së zgjedhjeve të 11 qershorit, edhe pse në tërësi ishin të qeta dhe pa ndonjë incident, as këto nuk shpëtuan pa parregullsi të ndryshme. Ahmetaj ka thënë për “Zërin” se ka pasur parregullsi në regjistrimin e të dhënave nga formularët e rezultateve, ku ka pasur mospërputhje brenda formularit të rezultateve.

“Parregullsitë mund të jenë të ndryshme, sidomos në regjistrimin e të dhënave nga formularët e rezultateve, ku ka mospërputhje brenda formularit të rezultateve, mirëpo të cilat Qendra e Numërimit dhe Rezultateve do t’i korrigjojë të gjitha këto mospërputhje dhe do të dërgojë rekomandime tek Komisioni Qendror i Zgjedhjeve për të marrë vendim për të gjitha ato vendvotime ku mospërputhjet mund të evitohen”, ka shpjeguar ai duke shtuar. “Pra, ka raste kur subjekti ka vota ndërsa kandidatët nuk kanë ose subjekti nuk ka vota dhe kandidatët kanë apo ndonjë kandidat ka më shumë vota sesa subjekti. Pra, raste të ndryshme dhe të gjitha këto raste do t’i evidentojë Qendra e Numërimit dhe Rezultateve. Pra, do të dërgohen rekomandimet tek Komisioni Qendror i Zgjedhjeve për të marrë vendim për to”, ka treguar Ahmetaj.

Kurse, sa i përket votave të pavlefshme, ai thotë se ende nuk dihet arsyeja e këtij fenomeni. Ahmetaj ka thënë se ndoshta Komisioni Qendror i Zgjedhjeve do ta krijojë një komision të veçantë për ta gjetur arsyen se përse ka pasur kaq shumë vota me kusht dhe të pavlefshme.

“Ndoshta është shumë vështirë për ta ditur arsyen dhe shkaqet se përse ka një numër kaq të madh të votave me kusht. Edhe pse në bazë të rezultateve preliminare janë diku rreth 50 mijë vota me kusht, që do të thotë rreth 20 mijë vota më tepër krahasuar me zgjedhjet e kaluara parlamentare. Është shumë herët të flitet në këtë aspekt, mirëpo me siguri KQZ-ja do të krijojë komision dhe do t’i shikojë të gjitha shkaqet dhe arsyet se përse ka mundur të ketë numër kaq të madh të fletëvotimeve me kusht dhe arsyet pse janë dëmtuar apo janë të pavlefshme, pra numërimi i këtyre votave. Kështu që KQZ-ja ndoshta do të formojë komision”, ka deklaruar Ahmetaj.

BKT Kosova hap degën më te re në qytetin e Suharekës

Sponsoruar