Opinionisti Agon Maliqi ka reaguar ndaj vendimit të MINT-it për Klan Kosova, duke thënë se ‘sulmi ndaj Klanit nuk është sulm vetëm ndaj Klanit, por përpjekje për ta nënshtruar dhe kërcënuar gjithë spektrin mediatik dhe biznesin privat’.

Maliqi, ka potencuar se ky hap që ka ndërmarr Qeveria, mund të konsiderohet si akti i parë i madh i metamorfozës së paralajmëruar të cubave ideologjikë në natyrën e tyre të vërtetë totalitare.

“Këmbëngulja për ta mbyllur me çdo kusht dhe në shpërfillje të ligjit Klan Kosovën, kanalin më të madh televiz në vend – duke e përdorur trukun më të vjetër në manualin e regjimeve autoritare, atë të luftës ndaj armikut (Serbisë) – nuk është një hap i rëndomtë i një qeverie ndaj të cilit mund të mbyllen sytë aq lehtë”, ka shkruar Maliqi.

-Advertisement-

“Pas disa vitesh laritjeje dhe maskimi në sytë e perëndimit si kampionë të demokracisë liberale, ky mund të konsiderohet si akti i parë i madh i metamorfozës së paralajmëruar të cubave ideologjikë në natyrën e tyre të vërtetë totalitare”.

“Klan Kosova historikisht i ka pasur lajmet ndër më të balancuarat në gjithë spektrin mediatik. Emisionet e saja kanë qenë gjithmonë të hapura ndaj VV-së, madje e kanë mundësuar rritjen e saj. Sulmi ndaj Klanit nuk është sulm vetëm ndaj Klanit, por përpjekje për ta nënshtruar dhe kërcënuar gjithë spektrin mediatik dhe biznesin privat – “ose i ndalni kritikat, ose e shihni se çka ju gjen”. Është hapi i parë testues i kufijve të rezistencës demokratike ndaj sundimit të ri autoritar”, shtoi ai.

Maliqi shton se ky është testi më i madh për shoqërinë civile, pasi sipas tij, ‘heshtja sot do të ishte kulminacioni i hipokrizisë’.

“Shumëkush në këto rrethana do të mund të tundohej ndaj këtij nënshtrimi. Por ata që bëjnë llogari të tilla le ta dinë se për totalitarët njerëzit janë lecka që hidhen në plehra sapo të mos jenë të dobishëm. Militanti më i madh i sotëm nesër rrezik edhe vetë, me pakënaqësinë më të vogël të shprehur, përfundon si agjent i Serbisë – sepse vetë e ushqeu këtë standard të qeverisjes”.

“Ky është mbi të gjitha testi më i madh për shoqërinë civile. Këtu kemi qenë kur të gjithë së bashku kemi reaguar dhe kemi protestuar për qindra skandale të qeverive të kaluara – prokurorive të kapura, kontratave milionëshë për rrugë, dallavareve me energji, etj. Heshtja sot do të ishte kulminacioni i hipokrizisë”.

“Mundeni me e ly me Nutella këtë copë bagle – pra me thanë se në rastin e Klanit bëhet fjalë për sundim të ligjit – por bagla mbetet bagël”.

Ai shton se në rastin Klan Kosova nuk ka shkelje ligjore me regjistrimin.

“Qysh p’e kuptoj situatën (juristët mund të më përmirësojnë) në rastin Klan Kosova nuk ka shkelje ligjore me regjistrimin. Problem tjetër është nëse në regjimin liberal të tregut ligji ua lejon korporatave manovrat e tilla të regjistrimit për motive përfitimi (të të drejtave televizive, tatimeve më të favorshme) apo sigurie juridike (si investim i huaj, qoftë edhe nga Maqedonia, je më i mbrojtur se si investim vendas). Në çfarëdo rasti Klan K. me gjasë e ka rastin e fituar në gjykatë bashkë me dëmshpërblimin eventual të cilin do ta bart mbi supe taksapaguesi për arbitraritetin politik të shtetit. Shtrohet pyetja atëherë se kush këtu po lufton për sundim të ligjit dhe kush po e përdhos atë”.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-