Sport

Agim Ademi mesazh homologut të tij danez për Eriksenin  

Autori: Gazeta inFokus 15:27 | 13 June 2021

Presidenti Agim Ademi nëpërmjet një mesazhi drejtuar homologut të tij danez, Jesper Møller ka shprehur solidaritetin e tij dhe të komunitetit të futbollit të Kosovës ndaj futbollistit Christian Eriksen, i cili mbrëmë në ndeshjen Danimarkë – Finlandë në kuadër të Euro 2020, u rrëzua në fushë dhe për disa momente luftoi për jetë.

Fatmirësisht gjendja e tij tani duket se është stabilizuar dhe pritet që ai t’i rikthehet jetës normale. Në letrën e tij, presidenti Ademi uron që Eriksen t’i kthehet sa më parë pasionit të tij – futbollit.

Letra e plotë e presidentit Ademi drejtuar homologut të tij, Jesper Møller:

-Advertisement-

Bota e futbollit dhe jo vetëm u shokua mbrëmë nga pamjet në ndeshjen Danimarkë-Finlandë, kur Christian Eriksen u rrëzua pa ndjenja në fushë.

Ai moment kritik për jetën e tij bëri që ankthi të na pushtojë të gjithëve, por njëherësh edhe na bashkojë në lutjet tona drejtuar Perëndisë për ta tejkaluar atë gjendje.

Fatmirësisht reagimi i stafit mjekësor, forca e tij për të luftuar për jetën dhe lutjet nga të katër anët e globit bën që Eriksen ta fitojë këtë betejë.

Tashmë kur vijnë lajme të mira nga stafi mjekësor që është nën përkujdesjen e Eriksenit, ne të gjithë ndihemi më të qetë dhe qëndrojmë në solidaritet të plotë me lojtarin, me shpresë dhe besim se së shpejti do t’i kthehet familjes së tij dhe futbollit edhe më i fortë.

Në emër të KE të FFK-së dhe gjithë komunitetit të futbollit në Kosovë uroj që Eriksen sa më parë t’i kthehet normalitetit dhe pasionit të tij – futbollit, për ta ndihmuar kombëtaren e Danimarkës dhe klubin e tij në arritjen e objektivave.

Lutjet dhe mendimet tona janë me ty Eriksen!

Të presim edhe më të fortë!

Me respekt,

Agim Ademi, president i FFK-së

Subscribe në YouTube: GAZETA INFOKUSI

Të tjera

Fokusi

sport