Lajme

Agim Ademi me fjalë prekëse: Sot 6 vite u bëmë pjesë e UEFA-a

Autori: Gazeta inFokus 09:46 | 03 May 2022

Kryetari i Federatës së Futbollit të Kosovës, Agim Ademi në gjashtë vjetorin e pranimit të FFK-së në UEFA ka thënë se ajo ditë, ishte përplot festë e emocione.

I pari i FFK-së ka thënë se sot pas 6 vitesh pranimi në UEFA, Kosova ka shënuar suksese e përparime të mëdha në futboll, shkruan Gazeta Infokus.

Ademi nuk ka harruar të falenderojë edhe gjeneratat para tij që ishin në krye të federatës, Agim Bytyqi, Rexhep Abdullahu, Sabri Hashani, Fadil Vokrri.

Postimi i plotw:

Sa herë vjen 3 maji me të drejtë përfshihemi nga emocionet dhe nuk ka se si të ndodhë ndryshe. Kjo datë për shtetin tonë, e sidomos për komunitetin e futbollit është e një rëndësie të veçantë.

Si sot, 6 vjet më parë, për Kosovën ishte një ditë feste me përplot emocione. Federata e Futbollit e Kosovës në Kongresin e mbajtur në Budapest arriti ta thyejë izolimin e padrejtë 25-vjeçar, duke u bërë anëtare me të drejta të plota e UEFA-s. Kësisoj, u përmbush ëndrra e kahmotshme dhe u shpërblye sakrifica e shumë gjeneratave të futbollistëve të Kosovës.

Nga ajo ditë futbollit të Kosovës iu hapën dyert e prezantimit në garat ndërkombëtare dhe filloi epoka e zhvillimit.

Sot, gjashtë vite më vonë, futbolli ynë ka shënuar përparime të dukshme dhe vazhdon pakthyshëm rrugëtimin e tij drejt sukseseve të reja, përmirësimit të infrastrukturës, masovizimit, edukimit të kuadrove të reja, reformave të garave dhe rritjes së cilësisë.

Në këtë ditë të veçantë, dua t’u shpreh mirënjohje dhe falënderim të gjithë atyre që kontribuuan në pavarësimin dhe rrugëtimin e futbollit kosovar që nga viti 1991, e që numri i tyre është jashtëzakonisht i madh; donatorëve të klubeve, familjeve që dhuruan tokat e tyre për t’i shndërruar në fusha futbolli, futbollistëve, trajnerëve, gjyqtarëve e punëtorëve sportivë të cilët përkundër represionit e maltretimeve rezistuan dhe e ruajtën lojën më të bukur në botë për ta mundësuar rrugëtimin drejt anëtarësimit në UEFA.

Mirënjohje e veçantë ish-prijësve të FFK-së, Agim Bytyqi, Rexhep Abdullahu, Sabri Hashani, Fadil Vokrri si dhe të gjithë bashkëpunëtorëve të tyre për punën e vazhdueshme deri në jetësimin e objektivit të shumë gjeneratave.

Urime e na priftë e mbara!

#BASHKËPËRFUTBOLLIN

Me respekt!

/Gazeta Infokus/