Sport

Agim Ademi falënderon tifozët për interesimin në përkrahje të Kombëtares së Kosovës

Autori: Gazeta inFokus 22:03 | 07 June 2022

Kryetari i Federatës së Futbollit të Kosovës, Agim Ademi, ka falënderuar tifozët dardanë për interesimin e jashtëzakonshëm në përkrahje të Kombëtares së Kosovës në Futboll, shkruan Gazeta Infokus.

Ai ka thënë se edhe pse kombëtarja debutoi me humbje ndaj Greqisë, tifozët dardanë ditën të vlerësojnë djersën e djelmoshave të Kosovës.

Ademi shton se mbështetja në ndeshjen më Greqinë por edhe kjo ndaj Irlandës së Veriut, ku Stadiumi Fadil Vokrri do të jetë i mbushur me tifozët nën jehonën e “Besa – Besë”, meriton mirënjohje e respekt.

Siç ka bërë me dije kryetari i FFK-së tashmë të gjitha biletat janë shitur, ndërsa kanë mbetur vetëm disa në zonën VIP, e të cilat mund të blihen online.

Postimi i plotë i Ademit:

“FALËNDERIM
Të dashur qytetarë, të dashur tifozë dardanë,
Shfrytëzoj rastin që të ju falënderoj të gjithëve për interesimin e jashtëzakonshëm për t’i qëndruar përkrahë Kombëtares së Kosovës.
Përkundër se në ndeshjen e kaluar u dëshpëruam me humbjen nga Greqia, ju dëshmuat se dini të vlerësoni djersën e djemve tanë, dëshirën dhe përkushtimin e tyre për të dhënë më të mirën në fanellën e shenjtë të Kosovës.
Futbolli është përplot emocion dhe i ka të tri rezultatet. Nganjëherë nuk e arrin dot objektivin gjatë 90 minutave lojë, por dëshira, vullneti dhe emocioni që na dhuron Kombëtarja jonë janë të jashtëzakonshme dhe ju dini t’i çmoni e vlerësoni ato.
Mbështetja madhështore që i ofruat Dardanëve në ndeshjen me Greqinë, por edhe tani për ndeshjen e radhës kundër Irlandës së Veriut, ku sërish stadiumi ‘Fadil Vokrri’ do të jetë përplot dhe do të jehojë me ‘Besa-Besë’, meriton mirënjohje dhe respekt.
Të gjitha biletat e kësaj ndeshje tashmë janë shitur, me përjashtim të një sasie të vogël për zonën VIP, e të cilat të interesuarit ende mund t’i sigurojnë përmes platformës online.
Në këtë formë ju e vërtetuat se Kombëtarja e Kosovës është dashuri e përjetshme dhe vlerë shtetërore, të cilën duhet ta ruajmë e respektojmë në fitore, barazime e humbje.
Ne jemi të vetëdijshëm se kapaciteti aktual i stadiumit ‘Fadil Vokrri’ nuk i përmbush kërkesat për numrin e madh të të interesuarve, prandaj ndjejmë keqardhje që shumë qytetarë janë të shtrënguar që ndeshjen ta ndjekin nëpërmjet ekraneve televizive.
Mirëpo, po punojmë së bashku me Komunën e Prishtinës, që së shpejti ta fillojmë projektin e zgjerimit të tribunës lindore, e cila do të na mundësojë që të kemi numër më të madh të tifozëve në stadium.
Faleminderit për mbështetjen e madhe!🙏
Ju ftoj që bashku t’i përkrahim djemtë tanë fuqishëm për t’u rikthyer te fitorja!
Forca Kosovë! 💪 ⚽️🇽🇰
Përpara Dardanë!
A.A.
#BASHKËPËRFUTBOLLIN”, ka shkruar kryetari i FFK-së, Agim Ademi në Facebook./Gazeta Infokus/

Të tjera