Lajme

Afganistan, sulm kamikaz ndaj autokolonës së NATO-s

Autori: Gazeta inFokus 14:13 | 02 August 2017

Një kamikaz ka sulmuar një autokolonë me trupa ndërkombëtare pranë aeroportit, në qytetin jugor të Kandaharit në Afganistan këtë të mërkurë, ndërsa konfirmohen edhe viktima.

“Jemi duke punuar për të mbledhur informacione sa më shpejt të jetë e mundur, e do të japim më shumë detaje në momentin e duhur”, thuhet në deklaratën e publikuar nga koalicioni ushtarak i udhëhequr nga NATO.

Një zyrtar lokal i sigurisë tha se agresori drejtoi një automjet të mbushur me eksplozivë drejt autokolonës, me të cilën u përplas. Ende nuk dihen detaje të tjera, apo të çfarë kombësie janë viktimat.

-Advertisement-

Një dëshmitar i agjencisë së lajmeve “Reuters” tha se helikopterë ushtarakë zbritën në vendngjarje të paktën 4 herë. Në aeroportin e Kandaharit ndodhet një nga bazat më të mëdha ushtarake të trupave ndërkombëtare, të cilët ndihmojnë forcat afgane të sigurisë.

Koalicioni ka ende afro 13 mijë trupa nga 39 vende të ndryshme të aleancës si pjesë e misionit trajnues, këshillues dhe ndihmës ndaj trupave afgane, të cilët nga ana e tyre po hasin vështirësi në administrimin e ringjalljes së kryengritësve talebanë.

Komandantë ushtarakë amerikanë në Afganistan kanë kërkuar prej kohësh shtimin e disa mijëra trupave në atje, por kërkesa e tyre ka ngecur ende në Uashington, ku presidenti Donald Trump ka shfaqur skepticizëm mbi zgjatjen e angazhimit amerikan në Afganistan.

Subscribe në YouTube: GAZETA INFOKUSI