Lajme

Abdixhiku: Kurti në sulm fatkeq ndaj miqve tanë ndërkombëtarë, aventurë e rrezikshme personale e tij

Autori: Gazeta inFokus 13:59 | 31 May 2023

Kryetari i LDK-së, Lumir Abdixhiku, ka folur në një konferencë për media rreth situatës së fundit të krijuar në veri, duke thënë se “po ballafaqohemi me një situatë të pamenduar e të paparë për një kohë të gjatë”.

Abdixhiku tha se përderisa bandat kriminale po sulmojnë në veri, kryeministri Albin Kurti ‘po sulmon’ miqtë tanë ndërkombëtarë.

“Kosova në sulm të vazhdueshëm nga banda kriminale të Vuçiqit, e kryeministri i Kosovës në sulm fatkeq ndaj miqve tanë ndërkombëtarë. Kjo nuk i kishte ngjarë ndonjëherë Kosovës më parë. Sa herë kemi qenë të sulmuar nga Serbia, kemi qenë të mbrojtur nga miqtë tanë ndërkombëtarë amerikanë dhe aleatët evropianë, sepse kemi vepruar bashkë me ta, sepse kemi ndarë të njëjtat vlera, të njëjtat interesa e të njëjtin vizion”, tha Abdixhiku në konferencë.

I pari i LDK-së tha se këtë ‘përmbysje aleancash, vizioni e prioritetesh’ për Republikën e Kosovës, askush nuk e ka dashur në Kosovë.

“Për këtë përmbysje askush nuk ka votuar, prandaj këtu nuk mund të flasim për tjetër gjë, përveç se për një aventurë tejet të rrezikshme personale të Albin Kurtit, e cila nuk ka asnjë pikë të legjitimitetit politik e demokratik në Kosovë, sepse shkatërrimi i aleancës me miqtë tanë as nuk ka përputhje me vullnetin politik të popullit të Kosovës e as nuk është në interest të popullit të Kosovës, interesa strategjikisht të lidhura ngushtë me aleancën perëndimore e euroatlantike”, deklaroi ai.

Tutje Abdixhiku tha se miqtë ndërkombëtar të Kosovës duhet kuptuar drejtë situatën në veri.

“Sulmet e bandave në veri paraqesin rrezik real për Republikën e Kosovës dhe rajonin. Kjo situatë duhet kuptuar drejtë, në veçanti nga miqtë tanë ndërkombëtarë. Sulmet ndaj Republikës së Kosovës sot janë sulme ndaj paqes rajonale”.



Anëtarësohu në grupin e Infokus në Viber: GAZETA INFOKUS – VIBER – ANTARËSOHU

Dhe në grupin e Infokus në Facebook: GAZETA INFOKUS – FACEBOOK – ANTARËSOHU

Etiketa:
Nëse doktor Mitrev do të përdorte hemofiltrimin me qëllim që të mashtruar pacientët, do t’i kishte mashtruar të gjithë 1738…

Të tjera

Fokusi

lajme