Lajme

Abdixhiku akuzon Kurtin për dështim në krijimin e shumicës dhe thellim të krizës politike

Autori: Gazeta inFokus 15:01 | 06 May 2025

Kryetari i Lidhjes Demokratike të Kosovës, Lumir Abdixhiku, ka hedhur akuza të drejtpërdrejta ndaj Albin Kurtit për krizën politike në të cilën ndodhet vendi pas zgjedhjeve të 9 shkurtit. Përmes një letre publike drejtuar liderit të Vetëvendosjes, Abdixhiku ka theksuar se mosarritja për të krijuar shumicën dhe bllokimi i Kuvendit janë pasojë e veprimeve të Kurtit dhe partisë së tij.

“Nëpërmjet bllokimit të procesit të zgjedhjes së kryetarit të Kuvendit, ju, në mënyrë arbitrare, po pamundësoni konstituimin e legjislaturës së re,” thuhet në letrën e Abdixhikut, e publikuar më 6 maj 2025.

Ai e cilëson këtë situatë si “krizë të thellë politike dhe institucionale”, për të cilën sipas tij, përgjegjësia bie mbi dështimin e Kurtit për të ndërtuar partneritete politike pas zgjedhjeve.

-Advertisement-

“Sot, vendi ndodhet në një krizë të thellë politike dhe institucionale për shkak të dështimit tuaj që të krijoni partneritete politike që do t’ju garantonin shumicën,” vazhdon më tej kryetari i LDK-së.

Në vend të bashkëqeverisjes me Vetëvendosjen, Abdixhiku ka propozuar formimin e një Qeverie Nacionale të Tranzicionit me përfshirjen e të gjitha partive shqiptare parlamentare, si rrugëdalje nga kjo krizë.

Subscribe në YouTube: GAZETA INFOKUSI