Grupi Parlamentar i Aleancës për Ardhmërinë e Kosovës, protestën e Sindikalistëve të Pavarur të Kosovës, e ka quajtur mesazh të qartë ndaj Qeverisë se Ligji i Pagave duhet të kalojë sa më parë.

Andaj, AAK thotë se paga miminale duhet të përcaktohet nga qeveria sa më parë, bashkarisht edhe miratimi i Ligjit të Pagave.

“Protesta e sindikalistëve ishte mesazh i qartë për Qeverinë se Ligji i Pagave duhet të kalojë sa më parë”.

“Në një situatë ku kemi ngritje enorme të çmimeve në vend dhe përkeqësim të gjendjes sociale, shumë familje me vështirësi ia dalin ta mbushin shportën elementare të konsumit”, shkroi AAK në një postim në Facebook.

“Përcaktimi i Pagës Minimale dhe miratimi i Ligjit për Paga janë çështje që duhen trajtuar me urgjencë nga kjo qeveri”, përfundon reagimi.

Protesta e Sindikalistëve

Me pankartën ku shkruan “Kryeministër, realizo kërkesat tona. Parandalo grevën e përgjithshme”,  këtë të premte ka nisur protesta e organizuar nga Bashkimi i Sindikatave të Pavarura të Kosovës.

Nisja e protestës u bë nga Bibloteka Kombëtare në drejtim të Qeverisë, ndërsa sindikalistët të pakënaqur po kërkojnë rritjen e pagave, zbatimin e ligjit për sigurimin shëndetësor, si dhe ndryshim-plotësimin e Ligjit për skemat pensionale.

“Përcaktimi i Pagës Minimale, Miratimi i Ligjit për Paga, Nisja e zbatimit të Ligjit për Sigurimet Shëndetësore, Nënshkrimi i marrëveshjes kolektive gjithëpërfshirëse, Amendamentimi-ndryshimi i Ligjit për Skemat Pensionale të Financuar nga Shteti, pranimi i përvojës se punës për të gjithë të larguarit nga puna gjatë viteve të 90-ta, dhe të eliminohet kriteri prej 15 vite përvojë punë para vitit 1999”, janë disa nga kërkesat e sindikalistëve.

Njëri nga organizatorët e protestës, Atdhe Hykolli, para mediave tha se kërkesat e tyre janë të arsyeshme e jo rënduese.

“Kërkojmë hartimin e Ligjit të Pagave pa ndonjë zvarritje, e deri ky të miratohet dëshirojmë 100 euro shtesë për të gjithë sektorin publik”, tha Hykolli.

Ndërsa në anën tjetër, Rrahman Jashari, kryetari i SBASHK-ut tha se prej datës 20 prill do të jenë në grevë nëse kërkesat e tyre hasin në veshë të shurdhër.

“Këta punëtorë të arsimit, nga 20 prilli do t’i shohësh në grevë dhe populli lë ta dijë se fajtori i vetëm është kryeministri Kurti dhe qeveria e tij”, tha Jashari.

Numri i protestuesve është relativisht i lartë. /Albanianpost.com

Oferta ekstreme e majit – dyshek memory 100€ më lirë!

Sponsoruar