Njëri ndër kushtet kryesore për liberalizimin e vizave ndaj shtetit të Kosovës është luftimi i korrupsionit.

E në vitin 2020, institucionet e Kosovës nuk duket ta kenë marrë shumë seriozisht këtë luftë.

Këtë e tregojnë numrat e kufizuar të aktakuzave sa i përket korrupsionit të nivelit të lartë, shkruan Gazeta inFokus.

Ehat Miftaraj nga Instituti i Kosovës për Drejtësi, për Gazetën inFokus ka thënë që Kosova si politika por edhe drejtësia më shumë i intereson ulja e dënimeve për korrupsion, sesa luftimi i saj.

“Në këtë drejtim, Kosova gjatë vitit 2020 ka dëshmuar me veprime konkrete se nuk ka vullnet për të luftuar korrupsionin si në aspektin politika ashtu edhe në nivel të institucioneve të drejtësisë. Për më tepër, gjatë këtij viti është dëshmuar se politikës dhe drejtësisë më shumë i intereson zhvillimi i kulturës së pandëshkueshmerisë dhe amnistimi i korrupsionit se sa luftimi i saj”, ka thënë Miftaraj.

Për dallim nga viti 2019, këtë vit në Kosovë ka më pak aktakuza kundër personave me veprën penale korruptive.

“Prokurori i Shtetit nga 1 janar 2020 deri me 30 shtator 2020, ka ngritur aktakuza ndaj 176 personave, përderisa gjatë tërë vitit 2019, ky institucion kishte akuzuar 233 persona për vepra penale korruptive”, ka thënë Miftaraj për Gazetën inFokus.

Ndërsa Demush Shasha, Drejtor Ekzekutiv i Institutit të Politikave Evropiane për Gazetën inFokus është shprehur se proceset politike e kanë lënë Kosovën pa liberalizim të vizave.

“Sa i përket procesit liberalizimit vizave, Kosova ka humbur shumë kohë për arsye tërësisht politike. Ne kemi humbur momentumin pozitiv që ekzistonte në vitin 2016 për shkak mungesës së konsensusit të spektrit politik lidhur me çështjen e demarkacionit i cili i ka kushtuar qytetarëve te Kosovës tani pothuaj pesë vite izolim”, ka thënë Shasha.

Sipas tij, BE-ja hapi derën Kosovës që të jetë pjesë e Zonës Shengen në vitin 2016 por, skena politike e Kosovës refuzoj këtë ofertë duke mbajtur kështu qytetaret e Kosovës të vetmit në Ballkanin Perëndimor pa të drejtën e lëvizjes së lirë.

Bile ai gjithashtu tha se Kosova ka dështuar në ndërtimin e një sistemi në luftë kundër korrupsionit.

“Kosova dështoj të ndërtoj një sistem të pavarur të drejtësisë i cili do ishte në gjendje të shënoj progres në luftë kundër korrupsionit të nivelit të lartë”, është shprehur Shasha. /Gazeta inFokus/