Lajme

A i takon Presidenti LDK-së?

Autori: Gazeta inFokus 11:22 | 20 November 2019

“Nëse merren për baze rezultatet zgjedhore të 6 tetorit, me dhe pa Nismën në Kuvend, shumica e re qeverisëse LVV-LDK nuk do ti ketë 2/3 e deputetëve për të filluar procedurën e zgjedhjes së Presidentit të ri”. Kështu shkruan njohësi i zhvillimeve politike në vend, Blerim Vela në llogarinë e tij në facebook.

Ky, sipas tij, është kusht i domosdoshëm për fillimin e procedurës dhe mosplotësimi i saj mund të shpie në dështimin e zgjedhjes së Presidentit të ri, shpërndarjen e Kuvendit dhe rrjedhimisht mbajtjen e zgjedhjeve të reja, shkruan Gazeta inFokus.

“Në këtë situatë, duket i pa arsyeshëm insistimi i LDK-së që ajo të ketë drejtën ekskluzive që të nominoj kandidatin/kandidaten për Presidentin e ardhshëm të vendit. Insistimi i tyre ka kuptim vetëm nëse LDK paraprakisht ka siguruar mbështetjen nga partitë opozitare (PDK, AAK dhe Nisma/AKR) për kandidatin/kandidaten e tyre. Nëse ky është rasti, atëherë kërkohet transparencë e plotë nga ana e LDK së si ka arritur këtë mbështetje”, shkruan Vela.

-Advertisement-

Por, përderisa koalicioni i ardhshëm nuk do të ketë mbështetjen e 2/3 të deputetëve, ai thotë se më e arsyeshme do të ishte nominimi i një kandidature me autoritet publik por politikisht neutrale që do të mund të merrte mbështetjen e partive opozitare, shkruan Gazeta inFokus.

Vela vlerëson se për të arritur këtë mbështetje, LVV dhe LDK duhet të sillen ndryshe me opozitën në krahasim me qeveritë e udhëhequra nga PDK, si dhe të përfshijnë atë në çështjet e interesit shtetëror./Gazeta inFokus/

Subscribe në YouTube: GAZETA INFOKUSI