Presidentja e Kosovës, Vjosa Osmani ka vendosur sot, 15 prillin si datën për mbajtjen e seancës konstituive ku pritet të bëhet betimi i deputetëve të zgjedhur dhe zgjedhja e kryetarit të Kuvendit dhe nënkryetarëve pas zgjedhjeve të 9 shkurtit dhe certifikimit të rezultatit përfundimtar, shkruan Gazeta Infokus.

Sipas ligjit për seancën konstituive dhe formimin e qeverisë, para se presidentja të marrë këtë vendim, partia e parë fituese në zgjedhje pra Lëvizja Vetëvendosje duhet t’i faktojë presidentes se posedon numrat për formimin e qeverisë.

Deklarata e Glauk Konjufcës a ishte paralajmërim se i kanë arritur 61 vota për qeverinë?

-Advertisement-

Sot kryetari në detyrë i Kuvendit të Kosovës nga Lëvizja Vetëvendosje, Glauk Konjufca para gazetarëve tha se beson që tashmë i kanë votat për formimin e qeverisë së re.

“Sa i përket zgjedhjeve krejt çka presim është të themelohet shumë shpejtë Qeveria e Kosovës në parlament. Fillimisht parlamenti duhet të konstituohet. Besoj që i kemi numrat”, ishte deklarata e Konjufcës pasi bëri pas homazheve që bëri në 26 vjetorin e Masakrës në Lubeniq të Pejës.

Si mund të ngrijë procesi për zgjedhjen e kryeparlamentarit ?

Në bazë të rezultateve përfundimtare, kryetari i Kuvendit do t’i takojë Lëvizjes Vetëvendosje (LVV), e cila ka fituar më së shumti vota.

Por, nëse kjo parti nuk e propozon dikë për kryetar, procesi ka mundësi të ngrijë në vend.

Eugen Cakolli nga Instituti Demokratik i Kosovës ka thënë që nëse kjo ndodh, nuk do të ishte hera e parë.

“Bazuar në praktikën e vitit 2014, kur procedura e konstituimit të institucioneve kishte zgjatur gjashtë muaj – atëkohë Gjykata Kushtetuese nuk ka përcaktuar afat ligjor, as kushtetues, se brenda çfarë periudhe është i obliguar subjekti fitues i zgjedhjeve që të propozojë një kandidat për kryetar të Kuvendit”.

Më 27 mars 2025 janë certifikuar rezultatet përfundimtare të zgjedhjeve parlamentare të mbajtura më 9 shkurt, duke shënuar nisjen e afatit 30-ditor për mbajtjen e seancës konstituive të Kuvendit të Kosovës. Seanca e parë është caktuar për 15 prill, me ftesë të presidentes Vjosa Osmani.

Sipas Komisionit Qendror të Zgjedhjeve, Lëvizja Vetëvendosje (LVV) ka dalë fituese me mbi 390 mijë vota, përkatësisht 42.30% të votave, duke siguruar 48 ulëse në Kuvend.

Në vend të dytë renditet Partia Demokratike e Kosovës (PDK) me rreth 190 mijë vota ose 20.95%, e cila do të përfaqësohet me 24 deputetë.

Lidhja Demokratike e Kosovës (LDK) ka fituar mbi 170 mijë vota apo 18.27%, duke siguruar 20 ulëse.

Koalicioni mes Aleancës për Ardhmërinë e Kosovës (AAK) dhe Nismës Socialdemokrate ka marrë rreth 66 mijë vota (7.06%) dhe do të ketë 8 deputetë në përbërjen e re.

Ndërsa Lista Serbe ka siguruar mbi 39 mijë vota (4.26%) dhe do të përfaqësohet me 9 ulëse në Kuvend./Gazeta Infokus

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-