Javën e kaluar edhe në Kosovë u dyshua për një rast të infektuar me “Linë e Majmunit”.

Pacienti është i shtrirë në Klinikën Infektive, derisa po pritet rezultati i mostrës së tij që tregon nëse realisht ky person nga Dragashi do të jetë i pari me këtë virus në Kosovë.

Në emisionin Doktor Plus që është prodhim i Gazetës Infokus, Drejtori i Divizionit për komunikim me publikun, në MSH-së, Faik Hoti ka konfirmuar se deri dje mostra ende nuk është nisur për diagnostikim jashtë vendit.

“Ne patëm një takim dje me IKSHPK-në, në kuadër të takimeve të rregullta që i ka ministria, me të gjithë institucionet të cilat merren me situatën në kuptimin epidemiologjike dhe në bazë të informatave kanë qenë duke u përgatitur për ti dërguar mostrat sepse dërgimi i një mostre në një shtet tjetër iu nënshtrohet disa rregulloreve ndërkombëtare”, ka thënë Hoti.

Hoti ka shtuar se janë duke monitoruar situatën derisa ende nuk është konfimruar rasti i parë.

“Pra tash për tash në Kosovë e dimë kemi vetëm një rast të dyshuar do të presim disa ditë deri në marrjen e konfirmimit laboratorik nga Holanda nëse kemi të bëjmë vërtet me linë e majmunit apo ndonjë sëmundje tjetër të virusit apo natyre tjetër. Por përgjithësisht institucionet janë duke e monitoruar situatën, kanë marrë ato masat të cilat janë të domosdoshme për të qenë të përgatitur në rast që do të kemi raste dhe të menaxhohen nëse ato veç shfaqen”, ka shtuar Hoti.

E sa do të zgjatë kjo procedurë e dërgimit dhe kthimit të mostrës varet nga disa aspekte që sipas Hotit e bëjnë të pamundur caktimin e një date.

“Zakonisht kur kemi raste të një sëmundjeje e cila nuk ka qenë më herët e përhapur në Kosovë rastet e para kryesisht për analizë dërgohen në laboratorët referente, ndërkohë që Instituti pastaj i siguron përmes Organizatës Botërore të Shëndetësisë apo qendrës evropiane për kontrollë të sëmundjeve reagensat dhe analizat kryhen në vendin tonë. Kështu ka qenë edhe me gripin e derrit, kështu ka qenë edhe me Covid -19, mirëpo përgjithësisht nuk ka pasur asnjëherë probleme në diagnostikim sepse dërgohen ne laboratorët me të cilët kemi marrëveshje dhe bashkëpunim dhe natyrisht ndërtohen edhe kapacitetet tona”, ka thënë ai për “Doktor Plus”.

Kujtojmë që për herë të parë Lija e Majmunit u zbulua në vitin 1958 kur dy shpërthime të një sëmundjeje të ngjashme me linë ndodhën në kolonitë e majmunëve të mbajtura për ‘kërkime’ ku sipas Qendrës Evropiane për Parandalimin dhe Trajtimin e sëmundjeve Infektive mori edhe emrin “Lija e Majmunit”.
Ndërsa sipas OBSH-së virusi i lisë së majmunit është një ortopoksvirus që shkakton një sëmundje me simptoma të ngjashme, por më pak të rënda, me linë.

Ndërsa lija u zhduk në vitin 1980, lija e majmunëve vazhdon të shfaqet në vendet e Afrikës Qendrore dhe Perëndimore e së fundi filloj të përhapet edhe në vende të tjera të botës.

Ndërsa sipas tabelës së fundit të publikuar nga OBSH-ja me të dhënat e fundit, në Evropë ky virus tashmë është shfaqur në 20 shtete të Evropës.

Shteti me më së shumti raste deri më tash është Britania e Madhe me 207 raste ndërsa menjëherë pas saj vjen Spanja me 156 raste me linë e majmunit./Gazeta Infokus/

Ministria e Shëndetësisë merr masat e para për “Linë e Majmunit”