Korporata Energjetike e Kosovës ka bërë shpërndarjen e thëngjillit si dhuratë për punëtorët e saj, në fillim të muajit tetor. Por, edhe pse thëngjilli u është dhënë si dhuratë, kur e kanë marrë pagën e këtij muaji, në faturë ka figuruar se shumë për thëngjill. Për arsyen pse ka ndodhur kjo, ka folur Kryetari i Sindikatës së Punëtorëve, Nexhat Llumnica.

Kosova është duke u përballur me krizë energjetike qe disa muaj. E për t’ua bërë më të lehtë përballimin e kësaj krize, Qeveria e Kosovës ka vendosur që punëtorëve të Korporatës Energjetike të Kosovës, t’ju dhurohet një sasi e qymyrit 8 deri në 10 tonë.

Ministria e Ekonomisë e ka marrë vendimin më 21 shtator, derisa shpërndarja e thëngjillit për punëtorët e KEK’ut ishte bërë me 11 tetor.

Por, tash kur kanë dalë pagat e këtij muaji, në adresë të Gazetës Express kanë ardhur mesazhe se në faturë punëtorëve u ka figuruar një shumë për thëngjillin që kanë marrë.

Arsyen pse ka ndodhur kjo, e ka shpjeguar për Gazetën Express, Kryetari i Sindikatës së Punëtorëve te KEK’ut, Nexhat Llumnica.

Llumnica ka thënë se punëtorëve u kanë dalë pagat e plota, por se pjesa që figuron aty për thëngjill, është vlera e tatimit që e obligon ATK’ja KEK’un.

Sipas tij, 85 euro nga kostoja e thëngjillit tatimohen.

“Kjo është vetëm tatimim i 85 eurove, tatim në fitim që e obligon ATK’ja patjetër KEK’un për me u tatimu përndryshe mund ta dënojë KEK’un. Punëtorët i kanë marrë pagat e plota, por nuk kemi mujt krejt me i sqaru. Një pjesë të konsiderueshme i kemi sqaru se çka o kjo, ajo që s’është sqaru, është pak problem me kuptu se e kanë qit si të pakuptueshëm, e kanë qit vec si akontacion të cilën e kemi marrë e nuk ka shkru që për thëngjill, e për atë e kanë të paqartë punëtorët “, ka thënë Llumnica.

Ndryshe, Kosova ka më shumë se 10 miliardë tonelata linjit, që është lloji i thëngjillit, dhe si e tillë është vendi i pestë në botë për nga sasia e këtij resursi.

Sasinë më të madhe të energjisë elektrike, Kosova e prodhon nga djegia e thëngjillit në termocentralet e Obiliqit.

Punëtorët e KEK-ut edhe në të kaluarën kanë marrë thëngjill nga kompania.

Por, në vitin 2018, Ministria e Zhvillimit Ekonomik pati marrë vendim për ndalimin e dhënies së thëngjillit si dhuratë për punëtorët e KEK-ut.

Ky vendim është shfuqizuar në fund të muajit shtator, nga ministrja e Ekonomisë, Artane Rizvanolli, e cila ka theksuar se e ka marrë këtë vendim “në mënyrë që punëtorët të ndihmohen për tejkalimin e krizës”.

Comodita në Gjermani shpalos koleksionin e produkteve të reja në panairin Heimtextil në Frankfurt

Sponsoruar