Lajme

A do të ndryshojnë masat anti-C0VΙD?

Autori: Gazeta inFokus 16:03 | 10 Nëntor 2021

Qeveria e Kosovës, përkatësisht Ministria e Shëndetësisë, ndonëse kanë kaluar më shumë se dy javë qëkur ka vendosur për masat anti-Covid, ende nuk ka vendosur për rishikimin e tyre, shkruan Gazeta Infokus.

Qytetarët po vazhdojnë të ndjekin masat anti-Covid për bartjen e maskës dhe kufizimin e lëvizjes së lirë apo orën policore të vendosur nga ora 00:00, që ishin vendosur gjatë muajit tetor.

Lidhur me këtë nga Asociacioni i Komunave të Kosovës kanë vlerësuar se ora policore dhe bartja e maskës duhet të hiqet.

-Advertisement-

Në një prononcim për Gazetën Infokus, Sazan Ibrahimi, Drejtor Ekzekutiv i Asociacionit të Komunave të Kosovës tha se aktualisht situata është shumë e favorshme që ora policore edhe bartja e maskës të hiqen.

“Ne jemi duke pritur takimin e radhës me U.D. ministren e Shëndetësisë, Dafina Gexha- Bunjaku, që ta analizojmë situatën. Aktualisht situata është shumë e favorshme dhe besojmë që çështja e orës policore edhe çështja e bartjes së maskës për individët të cilët ecin vetëm në ambiente të jashtme, duhet të hiqen” tha Ibrahimi për Infokus.

Ai shtoi se për shkak të zgjedhjeve që do të mbahen këtë të diel takimi është shtyrë për javën tjetër.

“Është pritur që javën e kaluar të mbahet një takim, por unë mendoj se për shkak të zgjedhjeve të balotazhit që do të mbahen këtë të diel, niveli qendror do ta shtyjë takimin për javën e ardhshme” shtoi Ibrahimi për Infokus.

Ibrahimi shtoi se tashmë këto masa nuk kanë ndikim në uljen apo rritjen e rasteve.

“Aktualisht imunizimi i qytetarëve po ndikon në mos përhapjen e rasteve me covid-19, ndërsa ora policore dhe bartja e maskave po shihet se nuk po kanë ndonjë ndikim në uljen e rasteve me Covid-19” tha Ibrahimi për Infokus./Gazeta Infokus/