Sport

Zv.Presidenti Ademi: Fitorja e Dritës, sukses historik

Autori: Gazeta inFokus 11:23 | 30 June 2018

Mbrëmë skuadra e Dritës nga Gjilani ka shënuar fitore historike ndaj Lincoln me rezultatin 4:1, shkruan Gazetafokus.

Me këtë rast Zv.Presidenti i FFK-së, z.Agim Ademi, e ka uruar dhe përgëzuar skuadrën Kampione të Kosovës për suksesin e arritur.

Ky është urimi i tij.

-Advertisement-

Zv.Presidenti i FFK-së, z.Agim Ademi, e uron dhe e përgëzon KF “Drita” për kualifikimin historik në rrethin e parë kualifikues Ligës së Kampionëve, pasi në ndeshjen finale të rrethit parakualifikues, e cila u zhvillua sonte e ka mposhtur kampionin e Gjibraltarit, Lincoln Red Imps, me rezultat 4:1, pas vazhdimeve. Ndeshja në kohën e rregullt u mbyll baras 1:1. Golat për Dritën i shënuan Liridon Leci (2′, 105’+3′-pen), Xhevdet Shabani (120′) dhe Haxhi Neziraj (120′), derisa golin e vetëm për Lincoln Red Imps, e shënoi Pedro Corral (61′).

Urimi i zv.Presidentit, z. Agim Ademi

Me kërshëri dhe kënaqësi të madhe e kam ndjekur ndeshjen e sotme të skuadrës kampione të Kosovës, ashtu si gjithë dashamirët e futbollit të Kosovës, ku futbollistët e KF “Drita” me një angazhim të jashtëzakonshëm arritën të shkruajnë një faqe të re në historinë e futbollit të Kosovës në nivel të klubeve, duke u kualifikuar në rrethin e parë të kualifikimeve të Ligës së Kampionëve.
Në emrin tim dhe KE të FFK-së, e përgëzoj KF ‘Drita’ për këtë sukses historik në garat evropiane, me shpresën dhe besimin që edhe në ndeshjet e radhës kundër kampionit të Suedisë, Malmo, do të ketë paraqitje të tillë dinjitoze. KF “Drita” dëshmoi se futbolli i Kosovës është në rrugën e duhur dhe dita-ditës po vjen duke e ngritur nivelin e tij. Edhe një herë uroj gjithë stafin e KF ‘Drita’ dhe tifozët e saj për këtë sukses, duke i inkurajuar që të japin më të mirën e tyre në vazhdim.

Me respekt,
Agim Ademi, zv. President i FFK-së