Lajme

“Bashkohet” Kosova e Shqipëria

Autori: Gazeta inFokus 16:38 | 30 Maj 2018

Me 73 vota pro dhe asnjë kundër deputetët e Kuvendit miratuan Propozim-rezolutën për hapjen e tërësishme të kontrollit për hyrje-daljet e shtetasve të Kosovës dhe Shqipërisë nëpërmjet pikave të kalimit kufitar në Vërmicë, Qafë Prush dhe Qafë Morinë.

Ligjvënësit janë shprehur pro këtij propozimi, të deputetit të Partisë Socialdemokrate, Dardan Molliqaj, por se kanë pasur druajtje nëse po shkaktojnë probleme para ardhjes së rekomandimit për liberalizimin e vizave për qytetarët e Kosovës.

Lexo edhe : Kosova e Shqipëria flasin “pa pare”

-Advertisement-

Me këtë rast Molliqaj ka propozuar dy pika të rezolutës, të cilat parashohin, hapjen e tërësishme të kontrollit për hyrje dalje të shtetasve të Kosovës dhe Shqipërisë nëpërmjet pikave të kalimit kufitar në pikat kufitare Vërmicë, Qafë Prush dhe Qafë Morinë dhe nisjen e procedurave të domosdoshme kushtetuese për lidhjen e marrëveshjeve ndërkombëtare për hapjen e kufijve, për qarkullimin e lirë të njerëzve të cilët janë shtetas të Republikës së Shqipërisë dhe Kosovës.

Deputeti i VV-së, Rexhep Selimi, u shpreh se ky kufi nuk do duhej fare të ekzistonte, e aq më tepër siç ka ekzistuar deri më tash me pengesa shumë të mëdha. Por, pati edhe rezerva për implementimin e kësaj rezolute.