Sport

Katastrofë për Realin vetëm dy ditë para El Clasicos

Autori: Gazeta inFokus 15:34 | 21 December 2017

Cristiano Ronaldo e pati sërish të pamundur të merrte pjesë në seancën stërvitore të Realit të Madridit mëngjesin e kësaj të enjteje, vetëm 48 orë përpara “El Clasico”-s së të shtunës, në “Bernabeu”, kundër Barcelonës kryesuese të La Ligës.
Reali, kampion në fuqi, shkon në këtë përballje “për t’u fituar me çdo kusht” me plot 11 pikë diferencë nga Barça, edhe pse ka luajtur një ndeshje më pak, duke nënkuptuar se “Los Blancos”-ve u duhet me patjetër fitorja, nëse do të duan të mbeten në lojë për mbrojtjen e titullit.

Duke folur pas paraqitjes në finalen e fituar të Botërorit të Klubeve, të shtunën në Abu Dhabi, Ronaldo tha se ndieu dhimbje në pulpën e këmbës, pas një ndërhyrjeje të gabuar nga kapiteni i Gremios, Geromel, në fillim të ndeshjes, por shtoi se ishte i bindur që do të rikuperohej në kohë për përplasjen më të ndjekur të La Ligës, në “Bernabeu”.

Portugezi 32-vjeçar nuk mori pjesë në seancat stërvitore të së martës dhe të mërkurës së bashku me shokët e tij të skuadrës, e pavarësisht se Reali nuk ka lëshuar ndonjë deklaratë specifike mbi problemin e tij në pulpë, apo ndonjë dëmtim tjetër potencial, ai nuk ka mundur të punojë bashkë me grupin as të enjten.

-Advertisement-

“Ekipi është stërvitur në kryeqytet në përgatitjet përpara shfaqjes më prestigjioze të La Ligës me Barcelonën, që do të luhet në Santiago Bernabeu këtë të shtunë në orën 13:00”, thuhet në deklaratën zyrtare të klubit.

“Puna me topin ishte në qendër të vëmendjes së kësaj seance, në të cilën Zidane përfshiu edhe portierin e U19-s, Moha. Cristiano Ronaldo ka vazhduar të stërvitet i vetëm, jashtë fushës stërvitore, me dhe pa top, ndërsa Luca Zidane vazhdon procesin e riaftësimit”.

Trajneri Zidane ka 22 lojtarë të gatshëm për ndeshjen e së shtunës, me Karim Benzema dhe Sergio Ramos që kanë tejkaluar disa probleme të vogla, ndërsa Gareth Bale vijon me disa probleme, por jo sëmundje, pasi u aktivizua si zëvendësues në finalen e Botërorit të Klubeve.

Subscribe në YouTube: GAZETA INFOKUSI