Gianluigi Buffon e kishte të pamundur të hiqte dorë nga porta e Italisë, ashtu siç bëri një vit më parë Abbiati te Milani, sepse situata aktuale nuk ishte e përshtatshme.

Por përqafimi i Gigi Buffon ndaj Gigio Donnarummës ngjan shumë me atë të Christianit ndaj portierit të Milanit.

Një krahasim ky që thuajse përbën një provë, duke qenë se ka ndodhur në të njëjtin impiant “San Siro”, për të përcaktuar fatin e Gianluigi Donnarummës. Nëse majin e vitit të kaluar, Abbiati i dorëzoi dorezat e portës së Milanit, dy net më parë Buffon i dorëzonte atë të Italisë.

“Po lë pas një grup të rinjsh shumë të fortë që do të bëjnë botën të flasë për ta, përfshi këtu Donnarummën dhe Perinin, që nuk do të lejojnë të ndihet mungesa ime”, ishin fjalët e portierit juventin teksa jepte lamtumirën nga kombëtarja axurre, shkruan Top Channel.

Donnarumma gjendet jo edhe aq papritur përballë detyrës për të rishkruar historinë. Në fakt, ecuria e kësaj historie duhej të ishte zhvilluar shumë më ndryshe, por në futboll asgjë nuk është e sigurt.

Gigio dukej se e kishte të parakohshëm Botërorin e Rusisë, edhe pse rritja e tij është e përmasave kolosale. Megjithatë, pas hijes së Buffon mund të siguronte një eksperiencë të jashtëzakonshme për moshën e tij, por edhe për të mësuar të marrë përgjegjësi shumë të mëdha për vitet mbi shpinë.

Por nuk ndodhi kështu. Rusia do të mbetet ende shumë larg, plot 6.000 km, ndërsa Gigio duhet të vijojë me pushimet e gjata verore, pa një Botëror, por me një të ardhme thuajse të garantuar si titullar i Italisë.

Në dy vitet e fundit, nga tetori i vitit 2015 kur debutonte me Milanin, jeta e tij sportive është zhvilluar me një shpejtësi të skëtershme dhe nuk po njeh të ndalur. Kjo sigurisht e ka bërë të rritet më shpejt, e mbi të gjitha do t’i shërbejë atij tashmë që ka marrë “dorezat” në dorëzim nga idhulli i tij Buffon.

Dje, as ai dhe as Bonucci nuk morën pjesë në stërvitjen e zhvilluar në Milanello, kjo për shkak se kishte ende shumë keqardhje të mbetur nga një natë më parë që i ndryshoi atyre të dyve të ardhmen. Të shtunën në mbrëmje ata do të zbresin sërish në fushë për të luajtur ndaj Napolit.

Ndërkohë, Italia vet do të duhet të nisë planin e ri nga Gigio, i cili renditet i pari në listën e “FourFourTwo” për talentët më premtues të Europës nën 20 vjeç.

Marsi sjell Magji në ETC

Sponsoruar