Lajme

Kërcënohet me vdekje gazetari që kritikoi tubimin për Mladic’in në ditën e Srebrenicës

Autori: Gazeta inFokus 15:47 | 10 July 2017

Kolumnisti banjallukas, Dragan Bursac ka pranuar një sërë kërcënimesh me vdekje për shkak të kritikës për tubimin e paralajmëruar për përkrahje të Ratko Mladic’it.

Siç pretendohet, Bursac e ka braktisur Banjallukën për shkak të sigurisë personale.

Ai në televizionin rajonal N1 ka thënë se nuk frikohet, por përsëri duhet të jetë i kujdesshëm, sepse kërcënimet të cilat i ka marrë e rrezikojnë në mënyrë të drejtpërdrejtë jetën e tij.

-Advertisement-

Bursac ka thënë se kërcënimet e dërguara nëpërmjet të rrjeteve sociale nuk janë asgjë e re për të, por kërcënimet më të reja janë më të rënda dhe më konkrete deri tani.

Ai ka pretenduar se këto kërcënime i ka paraqitur në polici, duke shtuar se beson që strukturat e sigurisë këtë herë do ta kryejnë punën e vet.

Duke folur për atmosferën në Banjallukë, në të cilën ditën e komemoracionit në Srebrenicë do të mbahet tubimi përkrahës për Ratko Mladic’in, të cilin e organizon shoqata serbe Zavetnici (Të zotuarit), ai ka thënë se në këtë qytet ekziston shumica e heshtur e cila në një mënyrë miraton këtë tubim neofashist.

“Nuk është problemi te këta pesë për qind të fashistëve, problemi është te 95 për qind të njerëzve të cilët heshtin dhe të cilët nuk kanë thënë – ikni nga këtu. Problemi është te MPB’ja e cila ka lejuar një tubim të tillë. Një tubim të tillë, jo vetëm që duhet ndaluar, por këta njerëz duhet të gjenden dhe të dërgohen para drejtësisë, e jo të krijojnë atmosferë karnavali nëpër Banjallukë më 11 korrik. Kjo është jashtë çdo mendje të shëndosh”, ka thënë Bursac.

Kërcënimet me vdekje ndaj Bursac’it janë dërguar për shkak të tekstit “A po feston Banjalluka gjenocidin e Srebrenicës?”, në të cilin ka shprehur qëndrimet e veta mbi tubimin e paralajmëruar për përkrahje Ratko Mladic’it i cili është paralajmëruar për 11 korrik në Banjallukë. Teksti është publikuar në portalin Al Jazeera Balkans./gazetametro.net.

Subscribe në YouTube: GAZETA INFOKUSI